Read chopi Eksodha 37 Bible Online

Eksodha 37 - chopi bible

Eksodha 37

¹Bhezaleli a mahile dibhokiso da mapulango a mndonga wa setime, da mikono yimbidi ni hafu kulapha ka dona; ni mkono wumwewo ni hafu kuanama ka dona, se kudemba ka dona i ti ka mkono wumwewo ni hafu.

²A to di bhama ngu nzalama yo basa ngu hahanze ni mndani ka kona; kambe a rendelekisile ka dona mkhwazi wa nzalama.

³A to nyivilikisa a txi vekela ka dona mune wa masinda a nzalama, ngu txitimwi ka makhona a dona a mune; masinda mambidi ma vekilwe ka didhawa dimwedo ni masinda mambidi ka dimwani didhawa.

⁴A to di vatela mipakato ya mapulango a mndonga wa setime, a txi yi bhama ngu nzalama.

⁵Kambe a to wuleta mipakato amu ka masinda a madhawani ka dibhokiso, kasi kumana ku di pakata ngu yona.

⁶Ene a to maha txikhalo txa wuxinji ngu nzalama ya yinene; txa mikono yimbidi ni hafu kulapha ka kona, ni mkono wumwewo ni hafu kuanama ka kona.

⁷A to maha makerubhima mambidi, ngu nzalama yo tshulwa, ma txi emiswa ngu magwito ka txikhalo txa wuxinji, ngu didhawa ni didhawa;

⁸dimwedo dikerubhima ka didhawa dimwedo, ni dimwani dikerubhima ka dimwani didhawa. Makerubhima ma to mahwa ma di aha ka txikhalo txa wuxinji, ka otshe madhawa a dibhokiso,

⁹makerubhima ma ti ni mabhapi mambidi o lapha o nawulukela txitimwi, kambe ma ti fenengeta ngu mabhapi a ona txikhalo txa wuxinji.

¹⁰Ngu msana a to maha meza ya mapulango a mndonga wa setime. Yi ti ti ni kulapha ka mikono yimbidi, kuanama ka mkono wumwewo, ni kudemba ka mkono wumwewo ni hafu.

¹¹Se a to yi bhama ngu nzalama ya yinene, e maha mkhwazi wa nzalama ngu kurendelekisa.

¹²A to yi mahela m'hingano wa mpimo wa dianza kuanama ka wona, ni mkhwazi wa nzalama ngu kurendelekisa ka madhawa otshe.

¹³A to nyivilikisa masinda a mune a nzalama a txi ma veka aha ka mune wa makhona, ma ku ni minenge ya kona ya mune,

¹⁴masinda awa ma ti ti vekilwe hafuhi ka m'hingano ma txi rendekelana, kasi ku wuletisa ka ona mipakato yo rwala ngu yona meza.

¹⁵A to maha mipakato ya mapulango a mndonga wa setime, yi txi bhamwa ngu nzalama, kasi kurwala ngu yona meza.

¹⁶A to maha kambe simaha si si nga ti fanete kuvekwa ha mezani, simbiyana, siponi, sikadyana ni sidhingiselo so fenengeta ngu sona, sotsheso si ti mahilwe ngu nzalama yo basa.

¹⁷A to maha phande ya malambu ngu nzalama ya yinene; phande yiya yi to mahwa ngu kutshulwa; txikando txa kona ni madhavi a kona, ni magombe a kona, ni siluva sa kona, ni mavhuvhu a kona, ka txiya tximwetxo.

¹⁸Madhavi a mtxhanu ni dimwedo ma ti ti humelela ngu madhawani ka kona; madhavi mararu ngu ka dimwani didhawa ni mamwani madhavi a mararu ngu ka dimwani didhawa.

¹⁹Ka didhavi dimwedo, ku ti ni simbiyana siraru si txi nga txiluva txa alimonde, divhuvhu ni txiluva; ni ka dimwani didhavi ku ti ni simbiyana siraru so fana ni almonde, ni divhuvhu ni txiluva. Ngu toneto, ti nga mahwa ka madhavi otshe a mtxhanu ni dimwedo, ma humako ka meza ya malambu.

²⁰Ka didhavi da hagari ka phande ya malambu, ku ti ni mune wa magombe, o fana ni almonde, ni mavhuvhu a kona ni siluva sa kona;

²¹ku ti ti ni divhuvhu dimwedo ngu hagari ka madhavi mambidi o khata ma nga ti huma ngu ka phande ya malambu, divhuvhu dimwedo ngu hahatshi ka madhavi mambidi ngu msana ka kona. Ngu toneto, ka mtxhanu wa madhavi ni dimwedo ma nga txi huma ka meza yimweyo ya malambu.

²²Mavhuvhu awa, madhavi awa ni meza ya malambu ma ti ti maha tximaha tximwetxo, ni sotshe simaha i ti sa nzalama ya yinene, yo mahwa kumweko ngu kutshulwa.

²³A to maha malambu a kona a mtxhanu ni mambidi; situriso ni sitimo sa kona,[42] sotshe i ti sa nzalama ya yinene.

²⁴Ngu dhayimana yimweyo ya nzalama ya yinene a mahile meza ya malambu ni sotshe simaha sa yona.

²⁵A to maha txiluvelo txa dibaselo do bhumula ngu mapulango a mndonga wa setime, txa kulapha ka mkono wumwewo, ni kuanama ka mkono wumwewo. Txiluvelo i ti txa mune wa madhawa o fana, kambe ma ti ni mikono yimbidi ya kudemba; titshoka ta kona ti di patilwe kumweko natxo.

²⁶A bhamile ngu nzalama ya yinene txitimwi ka kona ka txiluvelo, madhawa otshe a kona ni madhavi a kona. Ka madhawa otshe a vekile mkhwazi wa nzalama ngu kurendelekisa.

²⁷Ngu hahatshi ka mkhwazi wonewo a vekile masinda mambidi a nzalama ka madhawa a mambidi, ka didhawa dimwedo ni ka dimwani, kasi ku wuletisa mipakato ayi yi vekelwako kurwala dibhokiso ngu yona.

²⁸Kumahilwe tiphingwi ta mapulango ngu mndonga wa setime, ti txi bhamwa nzalama.

²⁹A mahile kambe mtona wa kutota ko sawuleka ni txingema txo bhumula, so mahwa ngu wutxhari.