Read chopi Eksodha 5 Bible Online

Eksodha 5 - chopi bible

Eksodha 5

¹Ngu msana ka totshe Mosi ni Aroni va to tsula va txi ya wonana ni Faro, va txi ya kha vona: “MKOMA, Txizimu txa ka Israyeli, a womba tiya: Leka vathu vangu ve tsula, kasiku va txi ya ni mahela m'buso txiwulani.”

²Aniko Faro a to khene: “I mani[7]MKOMA, wa ku naza ni engisa dipswi dakwe, ni leka va ka Israyeli, ve tsula kani? Kha ni m'zivi MKOMA, kambe kha ni na mbi leka va ka Israyeli ve tsula.”

³Vona va wombile va txi kha vona: “Txizimu txa Vahebheru txi tile kwathu. Ngu mhaka yeto hi leke hi txi teka dipfhumba da masiku mararu hi txi tsimbila mu txiwulani, kasi ku hi txi ya phaxa ka MKOMA, Txizimu txathu, kasi txi si hi dayi ngu mtungu ni ditxhari!”

⁴Sekoko mfumeli wa Egipta a to khene kwawe: “Awe Mosi ni Aroni, ngu kutxani mi txi lava kukhulumetela vathu mthumoni kwawe kani? Tsulani mi txi ya thuma.”

⁵Se Faro a to engeta a txi khene: “Vathu vava mbangi ngutu mu ditikoni, kambe anu mi lava ku va lekisa mithumo yawe!”

⁶Ngu tona eto, ka donedo ditshiku, Faro a to ninga mthetho ka vaxoli va vathu ni ka vabhali, a txi khene:

⁷“Kukhukhela kuwa, mi nga sweni mi va ninga mwasi kambe vathuvo, kasiku ve maha sitini, nga nyamnova ni nyatulo. Vona vapune va na dule va txi ti rwalela kambe mwasi.

⁸Se va kurumeteni ti to va txi bhaka mtengo wa sitini, wu va nga bhaka nyamnova ni nyatulo. Mi nga hunguleni ni ka kudotho, nguko vona mikara. Ngu toneto, va khalako ngu tona va txi kha vona: Hi lava kutsula hi txi ya phaxa ka MKOMA, Txizimu txathu!

⁹Mthumo wa vona vathuvo wu nave wa hombe wo nemela ngutu, kasi va txi khatala ngu wona, va si engiseli mapswi a makuhu.”

¹⁰Sekoko vatsimbitisi va mithumo ni vathangeli vawe, va to huma ve womba ka vathu, va txi kha vona: “Faro a ti khene: Kha ni na mbi ngadi ni mi ninga mwasi kambe.

¹¹Tsulani anu mipune, mi txi ya ti lavela mwasi amu mi no sikota ku wu mana kona. Nguko mthumo wanu kha wu na mbi hungulwa.”

¹²Sekoko vathu va to hangalaka ka dotshe ditiko da Egipta, kasiku ve sengeletela matshina ya ma nga ti ti sala ku di funyetwe.

¹³Se vatsimbitisi va mithumo va to va nemeta, na va txi kha vona “Hetani mthumo wanu wotshe, wa ditshiku ni ditshiku, ku nga mbimo yile mi nga txi wuyiselwa mwasi.”

¹⁴Se vathangeli va ka Israyeli va to kwapelwa, avale vatsimbitisi va Faro va nga ti va vekile, na va txi kha vona: “Ngu kutxani nyamnova ni nyamsi, mi nga mbi heta kumaha sitini kufana ni kale kani?”

¹⁵Ngu kumaha keto, vathangeli va vanana va ka Israyeli va to ya dila ka Faro, va txi kha vona: “Ngu kutxani u txi maha tiya ka sithumi sako kani?”

¹⁶Kha vaswi va txi hi lavela mwasi, athu sithumi sako, kambe va kha vona: “Bhakani sitini;” se athu sithumi sako ha kwapelwa, kuve mnandu mbwa vathu vako.

¹⁷Ti di ngeto, ene a to xamula a txi khene: Anu mi mikara ngutu; ngu mhaka ya toneto mi wombako mi txi khanu: Hi lava kutsula hi txi ya khozela MKOMA.

¹⁸Ti di ngeto konkuwa tshumelani, mi txi ya thuma. Kha mi na mbiswa mi txi ningwa kambe mwasi. Hambi keto, mi na maha mthumo wa mtengo wonewo wa sitini, mi nga sikelwa.

¹⁹Sekoko vathangeli va vanana va ka Israyeli, va ti woni va di kuxuphekani ka hombe ngutu, nga ti va nga gelwa tona: “Mtengo wa sitini si mi bhakako ka ditshiku ni ditshiku kha wu na mbi hungulwa.”

²⁰Mbimo yi va nga khukha masoni ka Faro, va to mana Mosi ni Aroni va nga ti va rinzete.

²¹Va to va gela va txi kha vona: “MKOMA a na mi wonisise a txi mi thethisa! Nguko mi hi mahete dibava masoni ka Faro ni masoni ka sithumi sakwe, mi vekile ditxhari manzani kwawe kasi va txi hi daya ngu dona!”

²²Sekoko Mosi a to tshumelela MKOMA a txi khene: “MKOMA, ngu kutxani u txi xupha vathu vako kani? U ni rumete txani kani?

²³Nguko kukhukhela ni txi ya tikomba ka Faro, ni txi womba-womba nayo ngu ditina dako, ene se a maneka a txi xupha vathu vako, ngu ditshuri, khwa tirula vathu vako!”