Read chopi Eksodha 6 Bible Online

Eksodha 6 - chopi bible

Eksodha 6

¹Sekoko MKOMA a to khene ka Mosi: “Konkuwa, u na wona ti ni no maha ka Faro, nguko ngu mhaka ya mtamo wa dianza dangu, ene a na va leka va txi tsula, ni mhaka ya mtamo wa dianza dangu a na va tutumisa ditikoni kwawe!”

²Txizimu txi wombile kambe ka Mosi txi txi kha txona: “Ani ngani MKOMA!”

³ Ni humelete ka Abrahamu, ka Isaake ni ka Jakobe ni di Txizimu txa Mtamo-Wotshe; aniko ngu ditina dangu,[8] ani MKOMA, kha na ti zivekisa ngu dona.

⁴Kambe ni emisile txitumelano txangu navo, kasi kuvaninga ditiko da Kanana, ditiko di va nga zumba ka dona kota valuveli.

⁵Se ni engisile kudila ka vanana va ka Israyeli, avale va xuphwako ngu Vaegipta, ni za ni txi alakanya txitumelelano txangu.

⁶Ngu mhaka yeto, u na womba ka vanana va ka Israyeli u txi khawe: Ani ngani MKOMA, kambe ni na mi humisa ka mithumo yo nemela ya ditikoni ka Egipta, ni na mi thusa wukhumbini kwanu, kambe ni na mi tirula ngu dianza dangu da mtamo ni mthumo wa hombe wa kulamula.

⁷Ni na mi maha vathu vangu, se ani ni na va MKOMA Txizimu txanu, ni mi humisako ka mikaralo ya ditikoni ka Egipta.

⁸Ngu msana ani ni na mi yisa ka ditiko di ni nga thembisa ngu txixambanyo ka Abrahamu, ka Isaake ni ka Jakobe; kambe ni na mi ninga di txi maha thomba yanu; ani ngani MKOMA.

⁹Mosi a wombile totsheto ka vanana va ka Israyeli, aniko vona kha va mu engisa ngu kupandiseka, ngu mhaka ya kukarala ngu wukhumbi.

¹⁰MKOMA a wombile kambe ka Mosi a txi khene:

¹¹“Tsula u txi ya gela Faro, mfumeli wa Egipta, ti to e va leka vanana va ka Israyeli va txi huma ditikoni kwakwe.”

¹²Ti di ngeto, Mosi a wombile masoni ka MKOMA, a txi khene: “Wona taku, vanana va ka Israyeli kha va khatala ngu ti ni nga va gela. Se ti nga mahisa kutxani ti to Faro, a txi ni engisa kani? Ani kha ni sikoti kuwombawomba ta tinene.”

¹³Konako MKOMA a to gela Mosi ni Aroni ti to ve womba ka vanana va ka Israyeli ni ka Faro, mfumeli wa Egipta, to vona va rumilwe kuhumisa va ka Israyeli ditikoni ka Egipta.

¹⁴Avava misungo ya tinyumba ta vatate vawe: Vanana va Rubheni, matiwula a Israyeli, ngu vava: Enoki, Falu, Hezironi ni Karini; eto ndimwaya ta va ka Rubheni.

¹⁵Vanana va Simiyoni ngu vava: Jamuweli, Jamini, Ahodhi, Jakimi, Zowari ni Sawule, mwanana wa Mukanana, atiya ndimwaya ta ka Simiyoni.

¹⁶ Aawa matina a vanana va ka Levhi madingano ni tiveleko takwe: Gerisoni, Kohate ni Merari. Levhi a hanyile 137 wa malembe.

¹⁷Vanana va Gerisoni ngu txhatxhameto ya timwaya tawe ngu vava: Libhini ni Simeyi.

¹⁸Vanana va Kohate ngu vava: Ametame, Isari, Hebroni ni Uziyeli. Kohate a hanyile 133 wa malembe.

¹⁹Se vanana va Merari ngu vava: Mali ni Musi; atiya ngu tona timwaya ta ka Levhi, madingano ni tiveleko ta kona.

²⁰Amiramu a to tekana ni Jokabhedhi, hahani wawe, awu a nga veleka nayo Aroni ni Mosi. Amiramu a hanyile 137 wa malembe.

²¹Vanana va Isari ngu vava: Kora, Nefegi ni Zikiri.

²²Vanana va Uziyeli ngu vava: Misayeli, Elisafani ni Sitiri.

²³Aroni a tekanile ni Elixeba, mwanana wa Aminadhabhe, ndiya ya Nasoni, awu a nga veleka nayo Nadhabhi, Abhiyu, Eleyazari ni Itamari.

²⁴Vanana va Kora ngu vava: Asiri, Elikana ni Abhiyazafi; eto ndimwaya ta ka Kora.

²⁵Eleyazari, mwanana wa Aroni, a tekanile ni mwanana wa dihorana wa Futiyeli, awu a nga veleka nayo Finiyasi. Eyo ngu yona misungo ya vatate va ka Levhi, madingano ni timwaya tawe.

²⁶Aroni ni Mosi, ngu vale Txizimu txi nga womba kwawe txi txi kha txona: Humisani vanana va ka Israyeli ditikoni ka Egipta, ngu mabutho awe a tiyimbi.

²⁷Ngu vona va Aroni ni Mosi va nga womba ka Faro, mfumeli wa Egipta, va txi kha vona: Humisa va ka Israyeli ditikoni ka Egipta.

²⁸Ka ditshiku di MKOMA a nga womba ka Mosi ditikoni ka Egipta,

²⁹MKOMA a wombile ka Mosi a txi khene: Ani ngani MKOMA; womba ka Faro mfumeli wa Egipta, totshe ti ani ni kugelako.

³⁰Sekoko Mosi a to xamula masoni ka MKOMA, a txi khene: “Ani ni m'thu wa txidimiti; ngu mhaka yeto, mfumeli Faro, a na ni engisisa kutxani kani?”