Read chopi Eksodha 7 Bible Online

Eksodha 7 - chopi bible

Eksodha 7

¹Sekoko MKOMA a to khene ka Mosi: “Wona taku ni kumahile Txizimu masoni ka Faro; se Aroni, mwananu, a na va mprofeti wako.”

²Awe u na geletela Aroni totshe ti ni no kuruma, se ene a na womba ka Faro, kasiku e leka vanana va ka Israyeli va txi huma mu ditikoni kwakwe.

³ Aniko ani koko, ni na bangisa mbilu ya Faro, kambe ni na andisa mu ditikoni ka Egipta sikombiso sangu ni sidiwukiso sangu.

⁴Faro koko kha na mbi mi engisa; hambi ka toneto ani ni na veka dianza dangu txitimwi ka Egipta, nina humisa mabutho angu mu ditikoni ka Egipta, vona vathu vangu, vanana va ka Israyeli, ngu sitsayiso sa hombe.

⁵Sekoko Vaegipta va na tiziva ti to ani ngani MKOMA, ngako ni txi nawuluta dianza dangu txitimwi ka Egipta, ni txi humisa vanana va ka Israyeli hagari kwawe.

⁶Sekoko Mosi ni Aroni va mahile nga ti MKOMA a nga va rumisa tona.

⁷Se Mosi i ti ti wa tanga ya mtxhanu wa magumi ni mararu a malembe, ani Aroni a ti ti ni mtxhanu wa magumi ni mararu, ni malembe mararu, mbimo yi va nga ya womba-womba ni Faro.

⁸Se MKOMA a to womba ka Mosi ni ka Aroni, a txi khene:

⁹“Nga ti Faro a txi khene: Mahani sidiwukiso ngu didhawa danu; konako u na gela Aroni u txi khawe: Teka ndonga yako u txi rinza hahatshi masoni ka Faro; yona yi na hinduka yi txi maha mnyoka.”

¹⁰Sekoko Mosi ni Aroni va to tsula ka Faro, va to ya maha nga tonti MKOMA a nga va rumisa tona. Aroni a to rinza hahatshi ndonga yakwe, masoni ka Faro ni masoni ka mahalamu akwe, se yona yi to hinduka yi txi maha mnyoka.

¹¹Konako Faro a to ramba titxhari ni vanyamsorwo. Se tona titxhari ta ditikoni ka Egipta ti to maha toneto ngu wutxhari wa tona.

¹²Nguko mmwani ni mmwani a to rinza hahatshi ndonga yakwe, se tona ti to hinduka ti txi maha ni tona minyoka. Aniko ndonga ya Aroni yi to ti khadamulela tindonga tile tawe.

¹³Hambi ti di ngeto, mbilu ya Faro yi manekile yi txi banga ngutu, asi tumeli ku va engisa, nga ti MKOMA a nga ti va gelisile tona.

¹⁴Sekoko MKOMA a to khene ka Mosi: “Mbilu ya Faro yi na ni txitsikivi,[9] wa lamba kuleka vathu va txi tsula.”

¹⁵Tsula ka Faro ni mixo: Nguko ene a na huma a txi ya matini; u na ya m'verela ha tikasani ka mnambo, u di ñote ndonga manzani kwako ayile yi ngadi hindukile yi txi maha mnyoka.

¹⁶Awe u na ya m'gela ku khawe: “MKOMA Txizimu txa Vahebheru, a ni rumile kwako, a khene: Leka vathu vangu va txi huma, kasiku va txi ya ni khozela txiwulani. Nguko kala ni kuwa awe khu lavi ku ni engisa.

¹⁷ Ngu tiya MKOMA a nga womba: Konkuwa u na tiziva ti to ani ngani MKOMA: Ngu ndonga yiya ni ku nayo manzani ni na peka mati a mnambo, se ona ma na hinduka ma txi maha mnoha.

¹⁸Sihaka sa mnamboni si na fa, mnambo wu na nunga, ni Vaegipta va na xamuka va si naveli kusela mati a mnamboni.”

¹⁹MKOMA a wombile kambe ka Mosi, a txi khene: “Gela Aroni u txi khawe: Teka ndonga yako u txi guleta dianza dako txitimwi ka mati a Egipta, txitimwi ka minambo yawe, txitimwi ka milonga yawe, txitimwi ka magova awe ni txitimwi ka sisima sawe sotshe, kasi mati ma na txitxeka ma txi maha mnoha. Wu na maneka mnoha mu ditikoni kotshe ka Egipta, hambi ni mu ka siya so vatwa mwendo sa marigwi!”

²⁰Se Mosi ni Aroni va mahile nga ti MKOMA a nga va rumisa tona. Ene Aroni a to guleta ndonga, e peka mati a mnambo, ma to txitxeka ma txi maha mnoha.

²¹Sihaka sa mnamboni si to fa. Mnambo wu to nunga, Vaegipta va si sikoti kusela mati a mnamboni. Mnoha wu to maneka ditikoni kotshe ka Egipta.

²²Kambe titxhari ta Egipta, ni tona, ngu wutxhari wa tona ti to maha nga toneto; mbilu ya Faro yi to banga txima kha va engisa, nga ti MKOMA a nga ti wombile.

²³Faro a to tshumela a txi ya nyumbani kwakwe; hambi ka toneto, kha khatala mu mbiluni kwakwe.

²⁴Vaegipta votshe va to kela sisima hafuhi ni minambo kasi kuva txi mana mati amanene; nguko va ti si tikoti kusela mati a mnamboni.

²⁵Ku to pinda mtxhanu wa masiku ni mambidi, na MKOMA a di pekile mnambo.