Read chopi Eksodha 8 Bible Online

Eksodha 8 - chopi bible

Eksodha 8

¹Msana keto, MKOMA a to khene ka Mosi: Tsula ka Faro u txi ya m'gela tiya: “MKOMA a khene: Leka vathu vangu va txi tsula, kasi va txi ya ni khozela.”

²Nga ti u txi lamba ku va leka va txi tsula, ni na tata ditiko dako dotshe ngu makhele.

³Mnambo wu na tala ngu makhele, ona ma na kwela ma txi wulela mu nyumbani kwako, mu txibhiyani kwako ko otela kona, txitimwi ka m'bhedhu wako, ni mu tinyumbani ka mahalamu ako ni ka ngamu yako yotshe, ni mu sikhoni kwako, ni mu timbiyani kwako.

⁴“Makhele ma na maneka txitimwi kwako, txitimwi ka vathu vako ni txitimwi ka mahalamu ako otshe.”

⁵MKOMA a to khene kambe ka Mosi: “Gela Aroni u txi khawe: Guleta dianza dako kumweko ni ndonga yako txitimwi ka minambo, txitimwi ka milonga ni magova, u txi maha ti to ma txi tala makhele txitimwi ka ditiko dotshe da Egipta.”

⁶Aroni a to guleta dianza dakwe txitimwi ka mati a ditiko da Egipta, makhele ma to huma ma txi tata ditiko da Egipta.

⁷Sekoko titxhari ta ditiko da Egipta, ngu wutxhari wa tona, ti to humisa makhele ma txi hangalaka txitimwi ka dotshe ditiko da Egipta.

⁸Se Faro a to ruma kudhanwa Mosi ni Aroni, a txi khene kwawe: “Kombelani ka MKOMA kasiku e thavisa makhele ahawa kwangu, ni na leka vathu va txi huma, kasi va txi ya maha mphaxo ka MKOMA.”

⁹Se Mosi a to khene ka Faro: [10] “U na ni fanelo yo womba kwangu ti to ngu yihi mbimo ni no kukhongotela ngu yona awe ni mahalamu ako, ni vathu vako, kasiku makhele ma txi thaviswa kwako ni tinyumbani kwako, ma txi sala mnamboni ka Nilo dwe.”

¹⁰Faro a to womba a txi khene: “Mangwana.” Se Mosi a txi khene: “Ti na maheke nga kuwomba kwako, kasiku u tiziva tito, kha ku nga ho mmwani wo fana ni MKOMA, Txizimu txathu.”

¹¹“Makhele ma na thava kwako, ni mu nyumbani kwako, ni ka mahalamu ako, ni ka vathu vako votshe; ma txi maneka mnamboni ka Nilo dwe.”

¹²Sekoko Mosi ni Aroni va to khukha hafuhi ka Faro; se Mosi a to khongela ka MKOMA ngu mhaka ya makhele aawa a nga ti rumete ka Faro.

¹³Se MKOMA a to maha nga ti Mosi a nga khongelisa tona; se makhele ma to fa mu tinyumbani, mu magumani ni mu tithembweni.

¹⁴Vathu va to ma wungeletela ma txi maha tindunduma, aha koza ditiko di txi nyetwa di txi nunga.

¹⁵Aniko Faro mbimo yi a nga wona ti to i txhukwana, mbilu yakwe yi to banga. Ngu mhaka yeto, kha nga va engisa, nga ti MKOMA a nga ti wombile.

¹⁶MKOMA a wombile ka Mosi a txi khene: Gela Aroni u txi khawe: “Guleta ndonga yako u txi peka lithulu la mafu, ku na maneka tithwala ditikoni kotshe ka Egipta.”

¹⁷Aroni a to guleta dianza dakwe ni ndonga yakwe a txi peka lithulu la mafu, se ku to maneka tithwala ka vathu ni ka sihari. Ni lotshe lithulu la mafu li to txitxeka li txi maha tithwala mu ditikoni kotshe ka Egipta.

¹⁸Ti di ngeto, titxhari ta Egipta, ngu wutxhari wa tona, ti mahile ni tona, kasiku ti txi humisa tithwala, aniko kha ta sikota. Se ku to maneka tithwala ka vathu ni ka sihari.

¹⁹ Sekoko tiñanga ti to kha tona ka Faro: “Aliya litiho la Txizimu!” Hambi keto, mbilu ya Faro yi simamile yi txi banga, ngu mhaka yeto kha va engisa, nga ti MKOMA a nga ti wombile.

²⁰MKOMA a wombile ka Mosi, a txi khene: Khukha ni mixo u txi ya ema masoni ka Faro; nguko ene a na huma a txi ya matini ka mnambo, u txi ya m'gela tiya: “MKOMA a khene: Leka vathu vangu va txi tsula, veya ni khozela.

²¹Nguko u si leki vathu vangu va txi tsula, ziva ti to ni na ruma mabhawu txitimwi kwako, ni txitimwi ka sithumi sako ni txitimwi ka vathu vako, ni mu tinyumbani kwako. Tinyumbani ka Vaegipta ni ditikoni mu va manekako kona vona, ku na tala ngu mabhawu.

²²Se ka ditshiku dile, ni na hambanisa ditiko da Goxeni, adi va zumbako ka dona vathu vangu, ti to ku si maneki koneyo mabhawu, se u na tiziva ti to ani ngani MKOMA hagari ka ditiko dotshe.

²³Se ni na hambanisa hagari ka vathu vangu ni vathu vako; mangwana ngu kona ku no maheka mhaka ya txixaniso txiya.”

²⁴Se MKOMA a mahile tona eto, mabhawu amangi ngutu ma to wulela nyumbani ka Faro, ni tinyumbani ka mahalamu akwe, ni ditikoni kotshe ka Egipta; ni dotshe ditiko da Egipta di to onheka ngu mhaka ya mabhawu.

²⁵Sekoko Faro a to dhana Mosi ni Aroni, a txi khene: “Tsulani mi txi ya maha mphaxo wanu ka Txizimu txanu kona ditikoni muwa.”

²⁶Se Mosi a to khene: “Kha ti faneli kumahisa eto, nguko miphaxo yathu ka MKOMA, Txizimu txathu, njinyenyeko ka Vaegipta. Ngako hi txi maha mphaxo wathu hagari ka Vaegipta, miphaxo yile vona va yi nyenyako, kha va na mbi hi balisela ngu marigwi kani?

²⁷Hi leke hi tsula, hi txi tsimbila mnava wa masiku mararu txiwulani, ngu kona hi no ya phaxa MKOMA, nga ti ene a nga hi gelisa tona.”

²⁸Sekoko Faro a to khene: “Ni na mi leka mi tsula, mi ya maha mphaxo ka Txizimu txanu txiwulani; aniko mi nga yeni kule; ni khongeleleni nani.”

²⁹Se Mosi a to khene: “Konkuwa ni no maneka ni di humile hawa, ni na khongela ka MKOMA. Mangwana mabhawu, ma na thava ka Faro, ni ka mahalamu akwe, ni ka vathu votshe; aniko Faro a nga engete a txi ni dyelela, asi leki vathu va txi tsula kuya maha mphaxo ka MKOMA.”

³⁰Sekoko Mosi a to huma ngu nyumbani ka Faro, a txi ya khongela ka MKOMA.

³¹Se MKOMA a to maha nga ti Mosi a nga ti kombelisa tona, mabhawu ma to maneka ma txi thava ka Faro, ni ka mahalamu akwe ni ka vathu vakwe; kha ka nga sala ni da dimwedo.

³²Aniko, hambi ni ka txiya txikhati, Faro a to bangisa mbilu yakwe, kha leka vathu va txi tsula.