Read chopi Eksodha 9 Bible Online

Eksodha 9 - chopi bible

Eksodha 9

¹Msana keto, MKOMA a to khene ka Mosi: Tsula ka Faro, u txi ya m'gela tiya: Ngu tiya a wombako MKOMA, Txizimu txa Vahebheru: Leka vathu vangu va txi tsula, kasi va txi ya ni khozela.

²Nguko u txi lamba ku va leka va txi tsula, u txi va ñola ngu mbimo ya hombe,

³wona taku dianza da MKOMA di na peka mitxhambi yi yi ku bhuwani, ni mahantxhi, ni timbongola, ni makamelu, ni tihomu ni tinvuta, ngu mtungu wa hombe ngutu.

⁴Se MKOMA a na hambanisa mitxhambi ya Vaisrayeli ni mitxhambi ya Vaegipta, kha ku na mbi fa ni txa tximwetxo txifuyo txi txi lumbako vanana va ka Israyeli.

⁵Se MKOMA a to veka mbimo, a txi khene: “Mangwana MKOMA a na maha toneto mu ditikoni.”

⁶Se Mangwanani ka kona, MKOMA a mahile toneto a nga ti womba, sihari sotshe sa Vaegipta si manekile si di fite; aniko ni txa tximwetxo txihari txi lumbako vanana va ka Israyeli kha txa fa.

⁷Faro a to ruma kuya wona sifuyo sa va ka Israyeli, a txo gelwa ti to ni txa tximwetxo txihari txawe kha txa fa. Hambi keto, mbilu ya Faro yi to simama yi txi banga, kha nga va leka vathu va txi tsula.

⁸Sekoko MKOMA a to khene ka Mosi ni ka Aroni: “Welani dikhuma ngu manza anu ha txikho, Mosi a na di wavalasa txitimwi, masoni ka Faro.”

⁹Dona di na hinduka di txi maha lithulu lo hehuka txitimwi ka ditiko dotshe da Egipta, dona di vanga sithunye ka vathu ni ka sihari, asi si no phuxukela si txi maha mazuku a silonda, ditikoni kotshe ka Egipta.

¹⁰ Se vona va to wela dikhuma ha txikho, va txi ya masoni ka Faro, Mosi a to ya di wavalasa txitimwi;se di to va nga txigwere se vathu ni sihari va to tshakelwa ngu sijavi,

¹¹titxhari kha ta tsana kuema masoni ka Mosi, ngu mhaka ya sijavi, nguko ni tona ti ti tshapetwe ngu sona, kufana ni votshe Vaegipta.

¹²Kambe MKOMA a bangisile mbilu ya Faro, se ene kha nga va engisa, nga ti MKOMA a nga ti wombisile tona ka Mosi.

¹³Sekoko MKOMA a to khene ka Mosi: Wuka ni mixo uya ka Faro. U na ya m'gela tiya: MKOMA, Txizimu txa Vahebheru, a khene: “Leka vathu vangu va txi tsula kasiku va txi ya ni khozela.”

¹⁴Nguko, ka mbimo yiya, ni na ruma makhombo otshe kwako, ni ka mahalamu ako, ni ka votshe vathu vako, kasiku u txi tiziva ti to kha ku nga ho mmwani wo fana ni nani ha ditikoni kotshe.

¹⁵Nguko, i ti ku ani ni ti guletile dianza dangu ni txi kupeka awe ni vathu vako ngu mtungu wa lifo, nga u di fuvile ha mafuni;

¹⁶ se ngu mhaka ya toneto, ni ku lekile ni txi ku emisa kasi ku ni txi kukomba mtamo wangu, ni ti to ditina dangu di txi huwelelwa ha ditikoni kotshe.

¹⁷Awe u ngadi u txi ti guleta u txi wukela vathu vangu, u txi lamba ku va leka ve tsula kani?

¹⁸Wona taku mangwana, ka mbimo yona yiya, ni na maha ti to ma txi wa mati a maralala, ngu mtamo, aawa ma si ziviko kuwa ditikoni ka Egipta, kukhukhela makhatoni ka dona kala nyamsi.

¹⁹ Se konkuwa rumela ve wuyisa sihari sako sotshe, ni simaha sako sotshe si si ku hahanze, nguko ngako maralala ma txi wa, ma nata daya sotshe si si nota maneka si si nga tinyumbani.

²⁰Hagari ka mahalamu a Faro, avale va nga thava dipswi da MKOMA, va to kuluveta ve wuyisa tinyumbani sithumi sawe kumweko ni mitxhambi yawe ya sifuyo.

²¹Aniko, avale va nga mbi khatala ngu dipswi da MKOMA, va to leka sithumi sawe ni mitxhambi yawe ya sifuyo hahanze.

²²Sekoko MKOMA a to khene ka Mosi: “Nawuluta dianza dako u txi di komba nzumani, kasi ma txi wa mati a maralala ka ditiko dotshe da Egipta, txitimwi ka vathu, txitimwi ka sihari ni txitimwi ka mwasi wotshe mu tithembweni ni ka ditiko dotshe da Egipta.”

²³Mosi a to gwimba ndonga yakwe a txi yi komba txitimwi. MKOMA a to ruma singwalangwanda ni mati a maralala, ku to relela mndilo ha mafuni. Txizimu txi to maha ti to ma txi wa mati a maralala ha ditikoni kotshe ka Egipta.

²⁴ Se ku ti ti ni maralala ni mndilo wo patana ni maralala. I ti a mtamo ngutu, aale ma si ziviko ka nga wa o fana nawo, mu ditikoni ka Egipta, kukhukhela kukhatani ka ditiko da Egipta.

²⁵Mati a maralala ma to daya sotshe si si nga ti hahanze, vathu ni sihari, ditikoni ka Egipta. Ma hetile ni mwasi wotshe wa tithembweni, ma txi funyeletela mindonga yotshe ya txitinga.

²⁶Ditikoni ka Goseni, amu va nga ti ka dona va ka Israyeli, ku ti si wi mati a maralala.

²⁷Sekoko Faro a to rumisa kudhana Mosi ni Aroni, e va gela tiya: Konkuwa ani ni onhile; MKOMA a lulamile ngutu, ani ni vathu vangu hi onhile.

²⁸Khongelani ka MKOMA a txi emisa singwalangwanda kumweko ni mati a maralala. Ani ni na mi leka mi txi tsula, kha ni na mbiswa ni txi mi ñola kambe.

²⁹Sekoko Mosi a xamute a txi khene: “Msana ka kuva ni di humile mu didhoropani ni na nawuluta manza angu ka MKOMA; singwalangwanda si na ema, kambe kha ku na mbiswa ku txi wa mati a maralala, kasiku u txi ziva to ditiko di lumba MKOMA.

³⁰Kambe na tiziva ti to awe ni mahalamu ako, kha mi nzi kuva ni txithavo ka MKOMA Txizimu.”

³¹Se linyu ni sevhadha si datwe, nguko sevhadha yi ti ni timbewu, ani linyu aha ka litshava;

³²aniko fulaho ni mahila kha sa onhetelwa, nguko sa swela ku rumbuka.

³³Konako, Mosi a to khukha ka Faro e huma mu didhoropani, se e nawuluta manza akwe a txi ma komba ka MKOMA Txizimu. Singwalangwanda ni mati a maralala si to ema, se kha ka nga wa kambe mati a maralala ha ditikoni.

³⁴Kambe, Faro, ngako a txi wona ti to mati ni maralala ni singwalangwanda si emile, a to engeta e onha, ni kubangisa mbilu yakwe, ene ni mahalamu akwe.

³⁵Ngu kumaha keto, mbilu ya Faro yi to engeta kambe yi banga, kambe kha leka vanana va ka Israyeli va txi tsula, nga ti MKOMA a nga ti wombile ngu txisofu txa Mosi.