Read chopi Jobe 1 Bible Online

Jobe 1 - chopi bible

Jobe 1

¹Ku ti ti ni wamwamna wokari ditikoni ka Uzi, ditina dakwe i ti ti Jobe; ene i ti wamwamna wa ditshuri, wo lulama, ni txithavo ka Txizimu; ni kuvayilela wubihi.

²A velekile mtxhanu wa vafana ni vambidi, ni mahorana mararu.

³A ti ti fuyile 7.000 wa tinvuta, ni 3.000 wa makamelu, 500 wa mipatwa ya tihomu, ni 500 wa timbongola; kambe a ti ti thumelwa ngu vathu vavangi ngutu; aha kaku, wamwamna wuwa, i ti ti wa hombe kupinda votshe va Wutxani.

⁴Se vanana vakwe va ti tiya ve maha mibuso ka mmweyo ni mmweyo ngu ditshiku dakwe; se va ti ti rumisa kuya dhana tindiya tawe tatiraru, kutadya ni kusela navo.

⁵Ku ti ti maheka ti to, ma di pindile masiku ale a mibuso yawe, Jobe a ti ko rumisa ti to, ve sawulekiswa, se e wuka ngu mabimbi-kutxa, e ningela miphaxo, madingano ni mtengo wawe votshe; nguko Jobe a ti ti khene: Va nga nda dhuka va di onhile vanana vangu se[1] ve ruketela Txizimu timbiluni kwawe. Jobe a ti ti mahisa toneto yotshe mbimo.

⁶Na ku ti hokile ditshiku dile vanana va Txizimu va nga ta masoni ka MKOMA, Sathani nene a ti ti hagari kwawe.

⁷Sekoko, MKOMA a to khene ka Sathani: Uta ngu hani kani? Sathani a to xamula ka MKOMA, a txi khene: No horolokela ha mafuni, ni tsimbila-tsimbila ka ona.

⁸Se MKOMA a to khene ka Sathani: Ina u woni txithumi txangu Jobe kani? Nguko kha ngaho mmwani ha mafuni wo fana nayo, wamwamna wa ditshuri ni kululama, wo thava Txizimu, wo vayilela wubihi.

⁹ Sekoko Sathani a to xamula ka MKOMA, a txi khene: Ina njithavo txa walo-walo a ku natxo Jobe ka Txizimu kani?

¹⁰Ina awe khwa mranganyeta ngu tithomba, ni nyumba yakwe, ni sotshe sile a ku naso kani? U katekisile mithumo ya manza akwe, wufuyi wakwe wa anda ha mafuni.

¹¹Aniko hi nga nawuluta dianza dako u txi m'gwesa ngu ka sotshe sile a ku naso, u txi na wona ku mwendo kha na mbi kuruketela u txi muwona!

¹²Se MKOMA a to khene ka Sathani: Wona ti taku, sotshe a ku naso si manzani kwako; wo lamba walo kusanzeka diwoko dako. Se Sathani a to khukha masoni ka MKOMA.

¹³Ku to maheka taku, ka dimwani ditshiku, vanana vakwe vavafana ni vamahorana, va txidya ni kusela m'tini ka mwanawe wa matiwula.

¹⁴Ku to bwaka mtumi a txi ta khene ka Jobe: Tihomu ti di kudimani, timbongola ti txidya hafuhi.

¹⁵Se Vasabhewu va to ta ti honyola, ve daya vafana ngu ditxhari; ngani nokha ni nga huluka, ni ku tiselako mahungu.

¹⁶A txi ngadi e xawutela, ku to bwaka mmwani mtumi, a txi ta khene: Kuwite mndilo wa Txizimu ngu nzumani, wu hisile tinvuta ni vafana, ve tshokoma; ngani nokha ni nga huluka, kuva ni kutisela mahungu.

¹⁷A txi ngadi e womba-womba-wuwa, kutile mmwani mtumi, a txi ta khene: Vakaldheya va rumile mitxawa yiraru, yi honyola makamelu yi tsula nawo, yi daya vafana ngu ditxhari; ngani nokha ni nga huluka, kuva ni kutisela mahungu.

¹⁸A txi ngadi e womba-womba wuwa, ku to bwaka mmwani a txi ta khene ka Jobe: Mbimo yile vanana vako vavafana ni vamahorana va nga ti ti dya ni kusela vhinya, m'tini ka mwanawe wa matiwula,

¹⁹kutile moya wa hombe ngu txiwulani, wuta peka otshe mune wa madhawa a nyumba, yiwa txitimwi ka vanana vako, se va fite; ngani nokha ni nga huluka kuva ni kutisela mahungu.

²⁰ Sekoko Jobe a to khukha, e vharulela syambalo sakwe, e yola msungo wakwe, e ti wisa hahatshi, e khongela.

²¹Jobe a to khene: Ni humile ngu mndani ka mwamwangu ni di tximbwiri, se ni na tshumelela kona kambe ni di tximbwiri; MKOMA a ningile, kambe MKOMA a tekile; di na guletwe ditina da MKOMA.

²²Ka totshe tiya, Jobe kha onha, hambi kulumbeta Txizimu.