Read chopi Jobe 11 Bible Online

Jobe 11 - chopi bible

Jobe 11

¹Sekoko Zofari, wa Mnahama, a to xamula a txi khene:

²Ina kutala ka siwotiso kha si na mbi xamulwa kani? Wamwamna wule wo wombawombela a na va ni ditshuri kani?

³Ka makuhu ako ina va na malala vathu khani? Se awe u na dhiwulela kupwateka ni wammweyo wo kuthela tingana kani?

⁴Nguko awe u ti khawe: Gondo yangu yi sawulekile; ni sawulekile masoni kwako.

⁵Ina ngu ditshuri Txizimu txi mlulamisete kuwombawomba e tula txisofu e ku xamula,

⁶se txi di kumahile u ziva sihunja sa wutxhari, si nga talelwa ngu kutsana; ngu kumaha keto, ziva taku Txizimu txa ku tsayisa ka kudotho, na kuve mnandu wako mbwo pinda mpimo.

⁷Ina u na manela tinzila ta Txizimu, uza u hokela kuhetelelani ka wa Mtamo-wotshe kani?

⁸Wutxhari wa Txizimu wu gulekile kufana ni kudemba ka nzuma; se awe u nga kota txani ku txi maha kani? Wuziviwo wu tshimile ngutu kupinda kuhokoma ka mndiloni; awe u ziva ta txani kani?

⁹Wuziviwo wu laphile kupinda mafu; ni kuanama ko pinda ka linene.

¹⁰Ngako Txizimu txi txi khundumusa, ni kutsiva, mwendo kupata, i mani a no txi tsimba kani?

¹¹Nguko txona txa va ziva vathu va walo, txa wona vale va mahanyelo o biha; ina kha txi na mbi va khawulisa kani?

¹²Aniko m'thu wa diphanga mbwo pwata mapimo; ina, m'thu a velekwa kufana ni mbongola ya txitinga.

¹³Ngako awe u di lulamisete mbilu yako, nawuluta manza ako kwakwe;

¹⁴ngako wu ti ho wubihi manzani kwako, wu tshotshe kule ni nawe, kambe u nga leke ta walo ti maneka matendani kwako,

¹⁵sekoko khohe yako yi na guleka yi si nga ni tingana; u na tsana, khu na mbi va ni dijowa.

¹⁶Nguko u na divala mithumo eyo, u na yi alakanya kufana ni mati ale ma nga pinda.

¹⁷Se wutomi wako wu na woneka wu txi guleka, kufana ni mitshikari; hambi ku txo va ni txidema, ku na fana ni mixo.

¹⁸Kambe u na va ni kuthemba, nguko ku na vaho kuverela; u na wona madhawani kwako, u humula ngu kuthutha.

¹⁹Se u na otela, ni wammweyo kha na mbi kuxamala; votala va na swahutela khohe yako.

²⁰Aniko maso a vo biha ma na pfhupela; wuthavelo wa ona wu na mwalala; kuverela kwawe, i nava kuhuma ka muhefemulo.