Read chopi Jobe 13 Bible Online

Jobe 13 - chopi bible

Jobe 13

¹Wonani taku totshe tiya, maso angu ma ti wonile, tinzeve tangu ti ti engisile ni ku ti pfisisa.

²Ati mi ti zivako, na ti ziva nani. Kha ni nga m'dotho kwanu.

³Se ni na womba ka wule wa Mtamo-Wotshe; ni lava kutiemela masoni ka Txizimu.

⁴Kambe anu koko, mi vasiki va makuhu, anu motshenu kha mi nga tiñanga ta txilo.

⁵Ti txi dingana ku mi malala ka totshe, eto ti ndi nava wutxhari wanu!

⁶Engisani konkuwa kutiemela kwangu, pfisisani mapswi a txisofu txangu.

⁷Ina mi nga dhuka mi womba kubiha ngu Txizimu, se mi nuwela makuhu ngu txona kani?

⁸Mi na txi tumela kani? Mi na txi lwela Txizimu kani?

⁹Ti ndi nava tinene ngako txi txi mi xola kani? Mwendo mi na txi mimela nga mo mimela ni wihi m'thu kani?

¹⁰Ngu ditshuri txi na mi tsayisa, ngako mi txi sawulela vathu ngu kusisala.

¹¹Ina kuguleka ka Txizimu kha ku na mbi mi xamalisa kani? Kuthisa ka txona kha ku na mbi wa txitimwi kwanu kani?

¹²Mapimo anu ma fana ni dikhuma; kuguleka kwanu kufana ni kuguleka ka ndope.

¹³Malalani masoni kwangu, ni na womba-womba ani; txi nate txitimwi kwangu ni txihi txi tako.

¹⁴Njitxani txi nga ni mahako ni ñola nyama yangu ngu makwasa, se ni veka wutomi wangu manzani kwangu kani?

¹⁵Hambi txi txi ni daya Txizimu, ni na ema ka txona; ni na emela totshe tinzila tangu masoni ka txona.

¹⁶Kambe toneto ti nava kuhanyiswa kwangu, nguko m'bihi kha na mbi ta masoni ka txona.

¹⁷Engiselani kha kwati ditshuri dangu; ngu tinzeve tanu, mitxhamuselo yangu.

¹⁸Wonani taku ni zumba ni di lulamisile mhaka yangu, kambe na tiziva ku ni na manwa ni di wo lulama.

¹⁹I mani wu a no lwa ni nani kani? Se ngako ni txi malala ni ndi na bhindula moya.

²⁰Maha silo simbidi ni nani; sekoko kha ni na mbi sisalela khohe yako.

²¹Tsulisa kule ni nani dianza dako, kambe u nga ni xamalise ngu kuthisa kwako.

²²Ni dhane koko, ani ni na orovela; mwendo ani ni na womba-womba, se awe u na ni xamula.

²³Minandu yingahi, ni sionho singahi ni ku naso kani? Ni mangale ngu mhaka ya sihambunyeto sangu ni sionho sangu.

²⁴Ngu kutxani u sisa khohe yako, u ni maha mlala wako kani?

²⁵Ina u nga phwarasela dizokoro do guletwa ngu moya kani? Se u na londisela asi si nga sala si di omile kani?

²⁶Se u bhalela txani timhaka to bava u ni wukela, u ni wuyisela sionho sa wuphyani kwangu kani?

²⁷ Kambe wa veka mikondo yangu sitshani, u ni riyela kotshe tinzilani kwangu, u veka sivango sa mikondo yangu,

²⁸Hambiko ani ni ku tximaha txo sina, txi gumako, ku nga txyambalo, txo dyiwako ngu sumba.