Read chopi Jobe 14 Bible Online

Jobe 14 - chopi bible

Jobe 14

¹M'thu wo velekwa ngu wamsikati masiku akwe madotho, kambe ma tate ngu sikarto.

²A mila ku nga txiluva, se msana keto e oma; kambe wa tutuma kufana ni mtsudi, se e mwalala.

³Awe u tula maso ako txitimwi ka eneyo, se u ni maha ni wulela ni nawe kulamulwani.

⁴(I mani wa wubihi waku a nga humisa so tshura kani? Lambi ni wammweyo!)

⁵Ngu ti to masiku akwe ma batwe mtengo wa mitxima yakwe wu manzani kwako; se awe u m'vekete mihingano, kha na ku yi ndaka.

⁶M'vayilele, ku va a txi na mana kuhumula, kala kuza a txi nga muendi, e tsakiswa ngu ditshiku da kona.

⁷Nguko mndonga wu verela kusandwa, wu na thunga kambe, niku kha li na mbi gwita linyempfu la kona.

⁸Ku si na mikoloti ya kona mafuni, txitsha txa kona txi na sina lithuluni,

⁹mndongewo wu txi na pfa mati, wu na thunga, ku na thunga mazokoro nga wo ngadi kuphawa.

¹⁰Aniko a txi fa m'thu, wa guma, ina, a di ningete muhefemulo wakwe m'thu, ahani kani?

¹¹Kufana ni mati a lineneni maphwako, ni mnambo waphwa, wu txi oma.

¹²Ngu kumaha keto, m'thu wa otela asi wuki kambe; kala kuza ku si maneki kambe nzuma, kha na mbi wuka, hambi kukhukha ngu wukoheni kwakwe.

¹³U txo ni sisa dithithani, u si ni wonekisi kala kuza kuhenya kwako ku ni vayilela, u ni vekela m'hingano, ni ku ni alakanya.

¹⁴Ina m'thu a txi fa, a nga tshumela e hanya kani? Otshe masiku a kulwa kwangu, ni na verela, kala kuza kumaneka kutxitxa kwangu.

¹⁵U ndi na ni dhana, se ani ni ndi na kuxamula; ninga wudhundo ka mthumo wa manzani kwako.

¹⁶Se konkuwa wa bala mazambo angu; eko khu njo wonetela sionho sangu kani?

¹⁷Wuhambunyeti wangu wu lemilwe amu ka disaka, se awe wa sengeletela wubihi wangu.

¹⁸Nguko ngu ditshuri, mmango wawa wu txi khundumuka; se dirigwi di khukha ka wukhalo wa dona.

¹⁹Mati ma kenya marigwi; ndambi ya mita lithulu la mafu; se awe wa maha ti to themba ya m'thu yi mwalala.

²⁰Awe yotshe mbimo wa mu wukela, se ene wa pinda; awe wa phemberusa khohe yakwe u txi mtsulisa.

²¹Vanana vakwe va dhundeka, na ene asi ti zivi; mwendo kuminyeteka na asi ti pfi;

²²aniko nyama yakwe, kwakwe ya pfa kupanda; ni moya wakwe kwakwe wa dila.