Read chopi Jobe 2 Bible Online

Jobe 2 - chopi bible

Jobe 2

¹Se ku to hoka dimwani ditshiku, dile vanana va Txizimu va nga ta ti wonekisa masoni ka MKOMA, nene Sathani a tile na a ti hagari kwawe, e ta ti wonekisa masoni ka MKOMA.

²Sekoko MKOMA a to khene ka Sathani: U ta ngu hani kani? Sathani a to xamula ka MKOMA, a txi khene: No horolokela ha mafuni ni tsimbila-tsimbila ka ona.

³Se MKOMA a to khene ka Sathani: Ina u woni txithumi txangu Jobe kani? Nguko kuwalo mmwani ha mafuni wo fana nayo wamwamna wa ditshuri ni kululama, wo thava Txizimu, wo vayilela wubihi, kambe a ku ngadi e vekisa wunene wakwe, hambiko awe u ngadi ni kujetete kumlwisa, kuva ni txi mlovisa hahanze ka mnandu.

⁴Sekoko Sathani a to xamula ka MKOMA, a txi khene: Didhowo ngu didhowo, se sotshe sile wamwamna a ku naso, a na diha ngu wutomi wakwe.

⁵Sekoko hi nga nawuluta diwoko dako, um'gwesa amu ka marambu ni nyama, u na wona mwendo kha na mbi kuruketela khoheni kwako!

⁶Se MKOMA a to khene ka Sathani: Ndiyoyo a manzani kwako; aniko veketa wutomi wakwe.

⁷Sekoko Sathani a to khukha masoni ka MKOMA, eya peka Jobe,[2] ngu txivango txo biha, kukhukhela hahatshi ka mkondo kala txitimwi ka msungo.

⁸Se Jobe a to teka txirengele e halela ngu txona silonda, e khalahatsha hagari ka dikhuma.

⁹Sekoko msikati wakwe, a to khene: U ngadi tsani ka wunene wako kani? Ruketela Txizimu, u txi fa.

¹⁰Aniko ene a to khene: Mawombawombelo a wamsikati wa txiphukuphuku eyo u ma thumisako; hi na amukela wunene ngu ka Txizimu, hi si amukeli ta walo kani? Ka totshe tiya, Jobe kha onha ngu txisofu txakwe.

¹¹Va di ti pfite koko vangana vararu va Jobe totshe to biha ti nga maheka txitimwi kwakwe, mmweyo ni mmweyo a tile ngu ka wukhalo wakwe: Elifazi Mutemani, ni Bhilidhadhe Musuwita, ni Zofari Munamani, va tshanganile ve ta mtsetsa ni ku mthavelela.

¹²Va di guletile maso ngu kule ve mtimelela, va to kwangula ngu mapswi o dila; se ve vharulela syambalo sawe, va to ti xwayela dikhuma ha msungo.

¹³Se va to khalahatsha nayo ha ka mafu, mtxhanu wa masiku ni mambidi ni mtxhanu wa wusiku ni wumbidi; ku si maneki ni wammweyo wo womba dipswi ni da dimwedo, nguko va woni taku kupandiseka i ti ti ka hombe ngutu.