Read chopi Jobe 20 Bible Online

Jobe 20 - chopi bible

Jobe 20

¹Sekoko Zofari, Mnamani, a to xamula a txi khene:

²Ta woneka taku mipimiso yangu, ya ni maha ani ni kuluveta kuxamula.

³Ani ni pfite kukawukwa ko ni thela tingana, aniko moya wa mapimiselo angu wu na ni xamulela.

⁴Ina mwendo khu ti zivi awe taku kukhukhela ka kaleko, kukhukhela kule m'thu a nga vekwa ha mafuni,

⁵litsako la vaonhi kha li sweli, ni kutsaka ka vakanganyisi nga mbimonyana kani?

⁶Hambi a ti laphike kuhoka nzumani, se msungo wakwe wu hoka marefuni,

⁷a na lova kufana ni mitximba yakwe apune, ngu ha ku si gwitiko; se ni vale va nga ti ti mu wona va na kha vona: Ahayi kani?

⁸A puruma kufana ni mloro, kha na mbi manwa, kambe a na tutumiswa kufana ni txiwoniso txa ha wusikuni.

⁹Diso dile di nga mmona kha di na mbi ngadi di mmona, hambi ni wukhalo wakwe kha wu na mbi ngadi wu mmona.

¹⁰Vanana vakwe va na lava kutsakisa sisiwana, ni manza awe ma na wusa tithomba takwe.

¹¹Marambu akwe ma tate ngu mtamo wa wuphya wakwe, aniko ma na otela ni nene lithuluni.

¹²Hambi wubihi wu txi tshamba mkanani kwakwe, se e sisa wubihi hahatshi ka lidimi lakwe,

¹³a veketa wubihi, kha wu leki, a veketa mkanani kwakwe,

¹⁴hambi keto, sakudya sakwe si na txitxa mndani kwakwe; si na maha nyongwa ya mnyoka mndani kwakwe.

¹⁵A mitile tithomba, aniko a na ti kosa; Txizimu txi na si humisa ngu mndani kwakwe.

¹⁶A na sela wuxungu wa mnyoka; lidimi la xaru li na m'daya.

¹⁷Kha na mbi ma wona mati o tutuma, minambo ni sinambwana sa wulombe ni mafura.

¹⁸A na tshumeta mihando ya mithumo yakwe, kha na mbi yi mita; madingano ni mtamo wa kutxitxa kwakwe, kha na mbi tsaka,

¹⁹nguko a tsindavetile sisiwana ni ku si leka, niku a honyote nyumba yi a nga mbi yi aka,

²⁰ngako a nga mbi mana kukhura mrumbuni kwakwe, ka thomba yakwe yo tsakisa ngutu, kha na mbi wuyelwa ngu txilo.

²¹Kha na mbi salelwa ngu txilo txo dya; ati tiku thomba yakwe kha yi na mbi va ya mbimo yo lapha.

²²Kutalelwani kwakwe ngu thomba, a na xaniseka; otshe manza a sikulungu ma nata txitimwi kwakwe.

²³Hambi si diho so khurisa mrumbu wakwe, kambe Txizimu txi na rumela kutura ka kuhenya ka txona, se Txizimu txi na rumela kuhenya txitimwi kwakwe a txi ya kudyani.

²⁴Hambi a nga tutuma e thava matxhari a tisimbi, aniko wulaho wa txikete wu na mfula.

²⁵A na dula txiholoma ha mmidi kwakwe, aniko txiholoma txo phatima txi na huma ngu ka nyongwa yakwe; se ku nava ni kuthava txitimwi kwakwe.

²⁶Txotshe txidema txi na sisala txihunjani ka Txizimu. Se mndilo wo mbi futetelwa wu na mlovisa, kambe wu na tshokomisa sotshe sile si no sala ditendani kwakwe.

²⁷Nzuma yi na kombekisa wubihi wakwe; se mafu ma na m'wukela.

²⁸Tithomba ta nyumbani kwakwe ti na thaviswa, ka ditshiku da kuhenya ka Txizimu, totshe ti na thekelela.

²⁹Atxiya, njiningo txa m'thu wo biha, txi tako ngu ka Txizimu, ayiya i thomba yile Txizimu txi m'vekelako.