Read chopi Jobe 22 Bible Online

Jobe 22 - chopi bible

Jobe 22

¹Sekoko Elifazi, Mutemani, a to xamula a txi khene:

²Ina eko m'thu a nga va ni txivhuno txokari ka Txizimu kani? M'thu wamnene a na ti vhuna apune.

³Mwendo awu wa Mtamo-wotshe a tsakiswa ngu ku u lulama, mwendo dibhindu dokari daku u hetelelisa tinzila tako kani?

⁴Mwendo wa kutsayisa ngu mhaka ya txithavo txi a ku natxo ngu ngawe, hambi ti to e kuyisa kulamulwani kani?

⁵Ina wubihi weko hi nga wa hombe, ni sionho sako sa kwa mbi guma kani?

⁶Nguko u zimile mseve ngu vananu, ku si nga ni txilo, u va tshambute syambalo ve sala di simbwiri.

⁷Khwa ninga mati o sela ka wo karala, se ka wa nzala u mtoni dipawu.

⁸Se mafu ma ti ti lumba wule wa mtamo, se wamwamna wule a nga ti ti mahelwa txithavo a ti ti zumba ka ona.

⁹U hangalasile tinoni ti si nga ni txilo, kambe mawoko a sisiwana ma funyeletetwe.

¹⁰Ngu toneto, ti ku riyelisako ngu titshenga, se u xomutwe ngu kuxaniswa ko wuyelela,

¹¹mwendo txidemani, emo u si woniko txilo; se mati o tala ma ku fengeta.

¹²Ina Txizimu kha txi nga txitimwi nzumani kani? Wona tinyeleti tile ti ku txitimwi; eto ti nga gulekisa tona.

¹³Se u khawe: Txi ziva txani Txizimu ngu tona tiya kani? Ina txi nga dhuka txi lamula amu txidemani kani?

¹⁴Marefu ngu ona wusisaleloni ka txona, kuva txi si woni; se txona txa tsimbila-tsimbila nzumani.

¹⁵Ina u nga va u di tsimbite ngu txinzilana txa kale, emo va nga tsimbila ngu kona vaonhi kani?

¹⁶Vona va thavisilwe ku si se hoka mbimo yawe; ndambi yi to thekela txitimwi ka sitsaniso sawe.

¹⁷Va ti ti kha vona ka Txizimu: Khukha ahawa kwathu. Se nji txani a nga hi mahela, awu wa Mtamo-wotshe kani?

¹⁸Wona, ene a tatile tinyumba takwe ngu silo; ngu kumaha keto, wudhota wa vaonhi wu nave kule ni nani!

¹⁹Avale vo lulama va mu woni ve tsaka, se awule wo mbi na mnandu a to va poyilela,

²⁰a txi khene: Ngu ditshuri, vaonhi va khundumusilwe, se mndilo wu tshokomisile vale va nga ti sate.

²¹Awe Jobe, ti pate koko ni Txizimu, u na mana kuthutha, ngu kumaha keto, wu nata kwako wunene.

²²Tumela, na ku kombela, mlayo wa txisofu txa txona, kambe veka mapswi a txona mbiluni kwako.

²³Se ngako u txi tshumelela ka wu wa Mtamo-wotshe, u na akwa; tsulisa kule wubihi wu wu ku ditendani kwako.

²⁴Sekoko u na sengeletela nzalama kufana ni lithulu, ni nzalama ya Ofiri, ku nga marigwi a sinambwanani.

²⁵Kambe hambi wa Mtamo-wotshe, a nga maneka i ti nzalama kwako, ni silivhela yo sengeletelwa.

²⁶Sekoko u na ti tsakisa ka wu wa Mtamo-wotshe, u nga guleta khohe yako ka Txizimu.

²⁷Awe u na kombela ka Txizimu, se txi na ku engisa; kambe awe u na maha ti u ti randako.

²⁸U txi ti emisela ka mhaka yokari, txi na va mtsanisi wako, se liwoningo li na phatima amu ka tinzila tako.

²⁹Va txi kupeka, u na khawe: Ku nave ho kuwuswa! Se Txizimu txi na hulukisa wule wo ti veka hahatshi.

³⁰Se txi na hulukisa ni wule i singako wo pwata mnandu; ina ene a na txhatxhiswa ngu kusawuleka ka manza ako.