Read chopi Jobe 23 Bible Online

Jobe 23 - chopi bible

Jobe 23

¹Hambi keto Jobe a to xamula, a txi khene:

²Kala ni nyamsi, kutitsetsa kwangu ka ni maha ni vilela; kuvhiluka ka ngumbe yangu kutshimile kupinda huwa yangu.

³O! I ti ku no ziva ko mana kona Txizimu! Sekoko ni ndi na hoka wukhaloni ka txona ko lamula.

⁴Ni ndi na xawutela ngu nzila ya yinene mhaka yangu, kambe txisofu txangu txi ndi na tala ngu mawombo.

⁵Ni ndi na ziva mapswi ale txi ndi no ni xamula, kambe ni ndi na ti pima ti txi ndi no ni gela.

⁶Ina madingano ni wuhombe wa mtamo wa txona txi ndi na lwa ni nani kani? Ahim-him! Kukhata txi ndi na ni emela.

⁷Koneyo awule wo lulama a ndi na womba-womba natxo, se ani ni ndi na ti txhatxhisa do gwita ka mlamuli wangu.

⁸Wona taku ni txi thangela, kha txi nga ho koneyo; se ni txi tshumela niya msana, kha ni txi mani.

⁹Ngako txi txi thuma ka dianza da txibhabha, kha ni txi woni; txi txi sisala ka dianza da txinene, kha ni txi woni.

¹⁰Kambe Txizimu txa ziva nzila yangu; txi na ni dukete, ni na huma kufana ni nzalama.

¹¹Mikondo yangu yi tsani, ka nzila yile txi nga tsimbila ngu yona; ni vekisile nzila ya txona, kambe kha ni na mbi hambuka ka yona.

¹²Ka sileleto sa txisofu txa Txizimu, kha ni zivi ka nga hambuka. Se mapswi a mkanani ka txona ni ma dhundile kupinda si nidyako.

¹³Se ngako Txizimu txi txi wukela wokari, sekoko i mania waku a nga txi jikisa kani? Ati ti lawako ngu moya wa txona, txi na maha toneto.

¹⁴Nguko txi na maha ati ti nga vekelwa ani kambe ndingi to fana ni tiya txi ku nato.

¹⁵Ngu mhaka yeto, na xomuleka masoni ka txona; kambe ngako ni txi wonisisa toneto, na thaviswa ngu txona.

¹⁶Nguko Txizimu txi sahile mbilu yangu, se awu wa Mtamo-wotshe a ni xanisile.

¹⁷Nguko kha na dhukiswa ku si se va ni txidema, kambe txidema kha txa sisa khohe yangu.