Read chopi Jobe 26 Bible Online

Jobe 26 - chopi bible

Jobe 26

¹Sekoko Jobe a to xamula a txi khene:

²Eto u nga vhunisa tona wule a nga si nga ni mtamo, kambe u tsanisile diwoko dile di nga si nga ni mtamo!

³Wona tile u nga layisa tona wule a nga si nga ni wutxhari. Niku kha ditshuri, u mmahile e ziva ditshuri, nga tona tile di nga ti ti ngu tona!

⁴Se mapswi u ma wombile ka mani kani? Niku i moya wa mani wu nga huma ngu kwako kani?

⁵Vafi va dhudhumela hahatshi ka mati, ni vale va zumbako konemo.

⁶Ka Txizimu, mndiloni kuzumba ku di tulekile, aniko kutimelani kha ku nga ni txo fenengela.

⁷Wuphemba ku gwimbwa ha ndengalengani; txi leketeta mafu aha ko mbi na txilo.

⁸Txa ñolisa mati amu ka marefu o dhemela, kambe direfu kha di bhandeki hahatshi ka mati.

⁹Txizimu txa sisa khohe ya txitulu txa txona txa wukoma, se ngu txitimwi ka txona txi gwimba direfu.

¹⁰Txi vekile m'hingano txitimwi ka mati ngu madhawani ka kona, ni magwito ka liwoningo ni ka txidema.

¹¹Tiphande ta nzuma ta deka-deka, ti xamala kuthisa ka Txizimu.

¹²Txa bhanda linnene ngu mtamo wa txona, kambe ngu wutxhari wa txona, txa wisa kutikulisa ka lona.

¹³Ngu Moya wa txona, txi tshurisete nzuma; ngu manza a txona, txi mahile mnyoka wo tsimbila ngu dibindi.

¹⁴Wona taku atiya ndikasa ta tinzila ta Txizimu; kambe ndidotho ngutu ati hi khalako ku tipfa ngu txona! I mani koko a ndi no ziva kudhinda ka mtamo txona kani?