Read chopi Jobe 28 Bible Online

Jobe 28 - chopi bible

Jobe 28

¹Kha ditshuri ku ni misiha, emo yi humako ngu kona silivhela, ni nzalama, i ku wukhalo wu va yi nyekisako kona.

²Simbi yi thaviswa mafuni, se ngu dirigwi kumahwa txikete.

³M'thu a tutumisile txidema txi tsula hahatshi ka mafu, a txi ya lava marigwi txidemani, ka mtsudi wa lifo.

⁴Txinambwana txa thekelela, kala hafuhi ka wule a zumbako hafuhi natxo, aha ko kha ti koteki kutxhatuka ngu mikondo; sekoko, m'thu wa jikisa mati me tsula.

⁵Mafu ale di humako ka ona dipawu, hahatshi ma phemberukela nga mndilo.

⁶Marigwi a kona nga wukhalo wa safira, kambe ma ni lithulu la nzalama.

⁷Ditshurido da timelelwa ngu nyamatate, kambe kha ma di wona maso a mndilo.

⁸Kha ma zivi ka nga kandetelwa ngu vanana va sihari sa kutiguleta, hambi ngonyamo ya tshofu, kha ya pinda ngu ka ona.

⁹M'thu wa khundumusela marigwi ngu manza akwe, kambe wa rindilita mimango kukhukhela hahatshi ka yona.

¹⁰Wa dhoda minambo ngu mu ka marigwi, se maso akwe ma tumbula sotshe somaha sa lisima.

¹¹Kambe wa tsiva minambo, ku si humi ni da dimwedo dithtotho, se a humisa hahanze asi si nga ti sisate.

¹²Se wutxhari wu na manwa hayi kani? Niku wu hani wukhalo wa mapimo kani?

¹³M'thu kha zivi lisima la wutxhari; wutxhari kha wu maneki ka mafu a vo hanya.

¹⁴Kuhokoma ku kha kona: Wutxhari kha wu nga kwangu, se linene ni lona li txi kha lona: Wutxhari kha wu nga kwangu.

¹⁵Kha yi na kuningelwa nzalama yo sefwa ngu mhaka ya wutxhari, mwendo kutxitxisa silivhela ngu wutxhari.

¹⁶Hambi kuxava wutxhari ngu nzalama yo sefwa ya Ofiri, hambi ngu onekisi, mwendo ngu safira.

¹⁷Ngu wutxhari kha yi na kuxavwa nzalama hambi kristali; kambe wutxhari kha wu na kutxitxiswa ngu txiningo txa lisima, txa nzalama yo sefwa.

¹⁸Wutxhari wa maha m'thu e divala korali ni kristali; nguko kumaneka ka wutxhari, ku txhuko, kupinda ka marubhime.

¹⁹Kha yi na mbi dinganiswa ni Topazi ya Etiyopiya, kambe kha yi sikoti kuxavwa ngu nzalama ya yinene.

²⁰Wutxhari wuta ngu hani koko, niku wu hani wukhalo wa mapimo kani?

²¹Nguko wu sisilwe ka maso a votshe vo hanya, kambe wu tsivetwe ka sinyana sa nzuma.

²²Kumwalala ni lifo, si kha sona: Hi pfite nduma yakwe ngu tinzeve tathu.

²³Txizimu txa yi ziva nzila ya wutxhari, kambe txona txa wu ziva wukhalo wa wutxhari.

²⁴Nguko txona txa wona magwito ka mafu; kambe txa wona sotshe si si kuho hahatshi ka nzuma.

²⁵Mbimo yile txi nga ninga mtamo ka moya, se txi teka tipimo ta mati txi veketela;

²⁶mbimo yile txi nga veka mlayo ka mati a nzumani, ni nzila ya nyangafula ya kudhinda.

²⁷Sekoko Txizimu txi woni wutxhari txi wu zivisa; txi vekile wutxhari ni ku wu tsanisa.

²⁸ Aniko txi to kha txona ka m'thu: Wona taku txithavo ka MKOMA, ngu txona i ku wutxhari, se ni kuhambana ni wubihi, ngu kona i ku wuzivi.