Read chopi Jobe 29 Bible Online

Jobe 29 - chopi bible

Jobe 29

¹Se Jobe a to simama ni txidinganiso txakwe, a txi khene:

²A! Ngu nga ku na mana mahanyelo a mitxima yile yi nga pinda, ku nga masiku ale Txizimu txi nga ti ti ni xayisa!

³Mbimo yile txi nga ti ti phatimisa dilambu da txona ha msungo kwangu, se ani, ngu liwoningo la txona, ni ti ti tsimbila mtemani;

⁴kufana ni masiku a wuphyani kwangu, mbimo yile txihunja txa Txizimu txi nga ti ti ditendani kwangu,

⁵mbimo yile a ngadi ni nani awu wa Mtamo-wotshe, na vanana vangu va di madhawani kwangu;

⁶ni txi ngadi ni kuwula mikondo yangu ngu mafura, na ku txi ngadi kututuma sinambwana sa mafura ngu marigwini;

⁷mbimo yile ni nga ti ti huma ngu txike txa didhoropa, ni txi rumisa taku ve ni vekela txitulu txangu.

⁸Majaha ma ti ti ni wona me sisala; se avale va tanga ya hombe va ti ti khukha va txi ema;

⁹vathangeli va ti si wombi dipswi ni da dimwedo, se va ti ti veka manza ha sisofu;

¹⁰vathangeli va to malala ve pwata ni txo womba, ni tidimi tawe ti namarela mikanani kwawe;

¹¹nzeve yile yi nga tiengisa, yi to ni katekisa; diso dile di nga ni wona, di to ni fakazela;

¹²nguko ani ni ti ti txhatxhisa txikulungu, txi nga ti ti dila, ni vale vo felwa ngu vaveleki, ve pwata wa ku va xayisa.

¹³Txikatekiso txa wule a nga ti ti lova, txi ni hokete, se ani ni ti ti tshumela ni tsakisa mbilu ya noni.

¹⁴Ni ti ti fenengela ni kuambala wululamo, wululamo wangu wu ti ti fana ni didhamba ni m'bhoti.

¹⁵Ani ni ti ti diso da dibhofu, ni mikondo ya txilima;

¹⁶ni ti ti tate wa sisiwana, ni londisela timhaka ta vale ni nga si va zivi;

¹⁷kambe ni ti ti phatula titshaya ta vabihi, ni va kambisa sile va nga ti si lumile ngu makwasa.

¹⁸Ani ni ti ti khani: Ni na fela txisakani kwangu, se masiku angu ma na engetekelana nga mafu.

¹⁹Mikoloti yangu yi ti ti nava hafuhi ni mati, se mwando wu ti ti zumba txitimwi ka madhavi angu;

²⁰kudhundeka kwangu ku ti ti wusetwa, ni wulaho wangu wu ti ti tsana manzani kwangu.

²¹Va txi nipfa, va ti ti verela va di malate, va ti ti pfisisa sileleto sangu.

²²Ni txi heta kuwomba mapswi angu, va ti si xamuli, se ditshuri dangu di ti ti jomba txitimwi kwawe;

²³nguko va ti ti ni verelisa kufana ni mati a nzuma; kambe va ti ti tula sisofu nga vo nengela mati o swela kuwa.

²⁴Ni txi va tsakela, va ti ti si kholwi, va si lavi ni kuwona khohe yangu;

²⁵ngani ni txi sawula nzila yawe, ni ti ti khalahatsha nga mthangeli; ni zumbisa ku nga mfumeli hagari ka masotxhwa akwe, kufana ni wule a thavelelako vale va dilako.