Read chopi Jobe 3 Bible Online

Jobe 3 - chopi bible

Jobe 3

¹Msana keto, Jobe a to tula txisofu e ruketela ditshiku da kuvelekwa kwakwe.

²Se Jobe a to womba, a txi khene:

³Di na loviswe ditshiku dile ni nga velekwa ka dona! Ni wusiku wule ku nga wombwa to kha vona: Ku ni txirumbu txa wamwamna!

⁴Di nave txidema ditshiku dile! Se Txizimu kona txitimwiyo txi nga ve ni mhaka nado, kambe ku nga maneke ni liwoningo ka dona!

⁵Di na tshakelwe ngu txidema ni mtsudi wa kufa; ma na zumbe ka dona marefu; di na xamalise ngu kutuvika ka dona ko nzihala!

⁶Txidema txi na teke wusiku wule, ku nga tsakwe mndani ka masiku a dilembe, ku nga balwe mtengo wa mitxima!

⁷O! Wusiku wule wu nave wa txiwunda, ku nga wulele ka wona kuembelela ka kutsaka!

⁸Va na di ruke avale va zivako kuruka masiku, va nga ti lulamisela kuhangalasa huwa ya kona.

⁹Ti na timeke tinyeleti ta tshonyana; ku na verele kuwoninga, ku ngate; kambe yi nga wone mikohe ya maso a wuronga!

¹⁰Nguko kha da seka matimba a mrumbu kambe kha da sisa kukarala ka maso angu.

¹¹Ngu kutxani ni nga mbi fela mndani ka mame kani? Ni nga mbi gwita ni txi ngadi ni huma ngu mndani kani?

¹²Ni amukeletwe txani ngu mazolo akwe kani? Ngu kutxani a nga ni mamisa ngu titshumbu takwe kani?

¹³Nguko ni ndi na fa konkuwa ni humula; ni ndi na otela, ni mana kuhumula.

¹⁴Ni vafumeli ni madhota a ditiko, va nga txi ti akela tinyumba ka makhalo a sisapa,

¹⁵mwendo ni vathangeli vale va nga ti ti ni nzalama, va nga ti ti hiketa tinyumba tawe ngu silivhela.

¹⁶Mwendo ngu kutxhiswa ko sisala, nga ni si nga ho kufana ni vanana vale va nga mbi wona kuwonekela ka ditambo.

¹⁷Eho, vo biha va tandeka kukhulumetela; se avale vo karala va humula kona.

¹⁸Eho, avale vo sungwa va humula kumweko se kha di pfi dipswi da muwoneleli.

¹⁹ Koneho, ku ni wa hombe ni wam'dotho, se khumbi ya txhatxheka ka nyamne wa yona.

²⁰Ngu kutxani vaxaniseki va simamako ve hanya kani? Va ningelwa txani liwoningo avale va sisiwana, ni wutomi ka vale va ku xomuloni,

²¹va verelako lifo, aniko kha li hoki; va kela va txi li lava kupinda ni thomba yo siswa.

²²Va ndaka ngu litsako, ve dhunda, va txi mana dithitha kani?

²³Se li ningelwa txani liwoningo ka wamwamna wule, nzila yakwe yi si wonekiko, a nga tsivelwa ngu Txizimu kani?

²⁴Nguko ni sanzi kudya dipawu dangu, kuta kukarateka kwangu; tihuwa tangu ti maha ngu kuthekela nga mati.

²⁵Nguko atile ni nga txi ti thava, ti tile kwangu, ni tile ni nga si ti tsaneli ti mahekile.

²⁶Kha ni tizivi kuhumula ni kupfa kuthutha, hambi kuzumbiseka, aniko kutile kwangu kukhulumetwa.