Read chopi Jobe 33 Bible Online

Jobe 33 - chopi bible

Jobe 33

¹Ngu toneto, kha ditshuri, awe Jobe, engisa ditshuri dangu, u pfisisa otshe mapswi angu.

²Wona taku, ni tute txisofu txangu; lidimi langu li wombawombile mkanani kwangu.

³Ditshuri dangu di na huma kuthembekani ka mbilu yangu; ni wuzivi wo hetiseka ngu mkanani kwangu.

⁴Ni vangilwe ngu Moya wa Txizimu; se kufuteta ka wu wa Mtamo-Wotshe, ku ni ningile kuhanya.

⁵Ngako u txi sikota, ni xamule; khukha u veka kha kwati ditshuri dako.

⁶Wona taku, ni tile ngu ka Txizimu, kufana ni nawe; ngu dimwani didhawa, nani ni to wumbwa.

⁷Wona taku, khu na mbi thava kudhukisela kwangu, hambi dianza dangu kha di na mbi kunemela.

⁸Kha ditshuri awe u wombile tinzeveni kwangu; se ani ni pfite dipswi da kuwomba kwako, u txi khawe:

⁹Ni basile; kha na hambunyeta txilo; ni sawulekile; kambe kha ni nga ni mnandu.

¹⁰Txizimu txa mana tinzila to ni wukela txi ni wona nga mlala wa txona.

¹¹ Txa beta mikondo yangu amu ka makhodha, kambe txa londisela tinzila tangu.

¹²Wona taku, ka tiya, na kuxamula: Khwa lulamisa; nguko Txizimu nja hombe kupinda m'thu.

¹³Se ngu kutxani u txi lwa natxo kani? Nguko txona kha txi na mhaka ngu ti u mahako.

¹⁴Kukhata, Txizimu txi womba kumweko ni ka wumbidi; aniko ni wammweyo kha ti pfisisi.

¹⁵ Ngu mloro, mwendo ngu txiwoniso, ni wusiku, mbimo yile vathu va manako wukohe wo tshima, na va di otete ha m'bhedhuni.

¹⁶Sekoko Txizimu txa tula tinzeve ta vathu, kambe txa tsanisa sileleto sa txona,

¹⁷kasi kuthavisa m'thu amu ka wubihi wakwe, ni kusisa kutikulisa ka m'thu;

¹⁸kasi kuvayilelisa muhefemulo wa m'thu diphalani, ni ti taku, wutomi wakwe wu si dawi ngu ditxhari.

¹⁹Kambe wa tsayiswa ngu kupanda a di ha m'bhedhuni kwakwe, ni kulwa ka kwa mbi gwita ka marambu akwe;

²⁰eza e nyenya ni dipawu kuhanyani kwakwe; ni moya wakwe wu txi nyenya sakudya so navetisa.

²¹Nyama yakwe yi guma na a txi yi wona; ni marambu akwe ma nga si woneki, konkuwa ma woneka;

²²se muhefemulo wakwe wu txi hoka diphalani; ni wutomi wakwe hafuhi ni lifo.

²³Se ngako m'thu a txo dhuka e vhunwa ngu ngelozi, mtxhamuseli, mmweyo hagari ka magumi a mazana, kasi kuzivisa m'thu kululama kwakwe,

²⁴sekoko yi na tsetsa m'thu, yi txi kha yona ka Txizimu: Mtxhatxhe, a nga relele diphalani; se ni mani txo mtekisa ngu txona.

²⁵Nyama yakwe yi na nakana nga ya limenzani, kambe yi nga ya masiku a wuphya wakwe.

²⁶Sekoko a na dila ka Txizimu, txi na tsaka ngu ngene, se a na wona khohe ya txona ngu kutsaka, kambe m'thu txi na mtshumetela wululamo wakwe.

²⁷A na wona vathu, a txi khene: Ni onhile, ni ndakile mlayo, aniko kha ta ni vhuna txilo.

²⁸Aniko Txizimu txi hulukisile muhefemulo wangu kuya diphalani; se ni na wona liwoningo, ni txi ngadi ni hanya.

²⁹Wona taku, totshe tiya, mithumo ya Txizimu, txi mahela m'thu, kumbidi ni kuraru,

³⁰kasi kuvayilelisa moya wakwe kutimelani, txi mu woninga ngu liwoningo la vo hanya.

³¹Engisa koko, awe Jobe, ni pfisise; malala, se ani ni na womba-womba.

³²Aniko, ngako u di ni to lava kuwomba, ni xamule; womba-womba, nguko ni lava ku kubasisa.

³³I si nga eto, awe ni engisele; malala, ni na kugondisa wutxhari.