Read chopi Jobe 35 Bible Online

Jobe 35 - chopi bible

Jobe 35

¹Elihu a to xamula kambe, a txi khene:

²Ina wa dingana kuwomba ku khawe: Kululama kwangu ka pinda kululama ka Txizimu, kani?

³Nguko u ti khawe: Ni na mana txivhuno muni kani? Ni ndi na bhindula txani txo pinda txionho tangu kani?

⁴Ani ni na kuninga xamulo, awe kumweko ni vangana vako.

⁵Hi nga dwe, u wonetela nzumani; u wonisisa marefu o guleka ngutu, ma ku txitimwi ngutu kupinda awe.

⁶ Se ngako u txi onha, Txizimu txi onhekelwa ngu txani kani? Hambi si txi tala sihambunyeto sako, u na txi maha txani Txizimu kani?

⁷Ngako u di lulamile, u na txi ninga txani Txizimu, mwendo txi amukela txani ngu manzani kwako kani?

⁸Wubihi wako wa maha ta walo ka mmwani m'thu; ni kululama kwako ka vhuna mwanana wa mkwanu.

⁹Va diliswa ngu mhaka ya kuxaniswa ka hombe; va diliswa ngu kutxikwa ngu diwoko da vahombe.

¹⁰Aniko ni wammweyo kha wombi ku khene: Txi hani Txizimu txi txi nga ni va nga kani? Txi ningako kuembelela ni wusiku kani?

¹¹Atxi txi hi mahako vo ziva kupinda sihari sa ha mafuni ni ku hi maha vo txhariha ngutu kupinda sinyana sa nzuma kani?

¹²Va dila, aniko Txizimu kha txi xamuli, ngu mhaka ya kutikulisa ka vabihi.

¹³Ditshuri ngu ti to, Txizimu kha txi na mbi engisela wukanganyisi, hambi kupfiwa ngu wa Mtamo-wotshe.

¹⁴Se ngu ka tile u nga womba, khu na mbi wona Txizimu; kulamula ku masoni ka txona; ngu mhaka yeto, txi verele.

¹⁵Se konkuwa, ngako ku sa nziko ku vhutuka kuhenya ka txona, kambe kha txi na mhaka ni va kutikulisa,

¹⁶koneko, Jobe a to tula walo txisofu, a txi tatela mapswi o mbi na wuzivi.