Read chopi Jobe 36 Bible Online

Jobe 36 - chopi bible

Jobe 36

¹A to engeta kambe Elihu, a txi khene:

²Ni verele ka kudotho, ni na kukomba taku, ku ngadi ni ditshuri do emela Txizimu.

³Wuzivi wa mawonelo angu wuta ngu kule; se M'vangi wangu ni na mninga wululamo.

⁴Nguko ngu ditshuri, mapswi angu hi nga a makuhu; awu wo thembeka kuwombani kwakwe, a ni nawe.

⁵Wona taku, Txizimu nja hombe ngutu; hambi keto, kha txi txhipisi ni wammweyo; nja hombe amu ka mtamo wa mbiluni.

⁶Kha txi leki m'bihi a txi hanya, kambe txa emela vale vo xupheka.

⁷Kha txi thavisi maso a txona ka vo lulama; kukhata txa veka vafumeli yotshe mbimo, se ngu kumaha keto va guletwa.

⁸Se ngako va di sungilwe ngu titxhini, ni kusungelelwa ngu tingoti ta sixaniso,

⁹txa va zivisa mithumo yawe ni sihambunyeto sawe; ngako va nga tsana ka sona.

¹⁰Txizimu txa va gela eto tinzeveni kwawe, kasi ku va gondisa, ni ti to va na hume ka wubihi wawe.

¹¹Se va txi engisa Txizimu ni ku txi thumela, va na heta masiku awe kha kwati, ni malembe awe amu kutshambani.

¹²Aniko, va si txi engisi, va na dawa ngu ditxhari, ve fuva, na va si nga ni wuzivi.

¹³Se va timbilu to kanganyisa, va ti ndindela kuhenyelwa; txi txi va sunga, kha va na mbi kombela kulamulelwa.

¹⁴Vafa i di ngadi vavaphya, se wutomi wawe wu lova manzani ka Vasodhoma.

¹⁵Txizimu txa txhatxhisa wo xaniseka kuxanisekani kwakwe, txa ti pfalisa tinzeveni ka vo xaniseka.

¹⁶Nguko se Txizimu txi na kuvayilelisa ka sixaniso, txi kuyisa ka wukhalo wo thandawuka, ku kuwalo kukamana, kambe siya sa meza yako si na tala ngu mafura.

¹⁷Kambe awe u taletwe ngu mapimo a wubihi; wulamuli ni kutsayisa si na kumanela.

¹⁸Ti wonele ti to u si henyi kupinda mpimo, u nga xengwe ngu kutalelwa ngu silo.

¹⁹Ina Txizimu txi ndi na themba tithomba tako, ni kotshe ku ti ningela kwako ngu mtamo, ku va u si kameki kani?

²⁰U nga navele kuwona wusiku, ewo vathu va hetwako ka wona.

²¹Ti wonele, u nga wekelele ka wubihi; nguko ngutu u nga ti sawulela u si se xaniseka.

²²Wona taku Txizimu txa guleka ngu mtamo wa txona; i mani a gondisako kufana natxo kani?

²³I mani a no komba Txizimu nzila ya txona, mwendo i mani a nga khene: Awe u mahile to biha, kani?

²⁴Alakanya kukulisa mithumo yako, ayile yi wonwako ngu vathu.

²⁵Votshe vathu va yi wona mithumo, ayi va yi wonako ngu kule.

²⁶Wona, Txizimu nja hombe kupinda wuzivi wathu; kambe kha ku na kubalwa malembe a txona.

²⁷Nguko txa sengeletela mathotho a mati, txi ma nisa ngu kutuvika ka kuhisa,

²⁸ale ma humako ngu ka marefu, ma nelako vathu na i di amangi ngutu.

²⁹Ina ku nga zivaneka kuanama ka marefu, ni kudhinda ka ditenda da kona kani?

³⁰Txizimu txa nawuluta txitimwi ka marefu liwoningo la txona, kambe txa fenengeta txitimwi ka linene.

³¹Nguko txi lamula vathu ngu sona, kambe txa va ninga sakudya so tala.

³²Txa fenengeta liwoningo ngu manza, txi txi li tsimba ku ma tshawunyeta.

³³Atxi txi hi zivisako mipiso ya txona, ni sihari sa hi zivisa ngu kuta ka txidhukisa.