Read chopi Jobe 38 Bible Online

Jobe 38 - chopi bible

Jobe 38

¹Msana ka tiya, MKOMA a to xamula ka Jobe, ngu mu ka txihuhuri, a txi khene:

²I mani ene wu a nzihalisako sileleto; ngu mapswi o mbi na wuzivi kani?

³Konkuwa, tsanisa txiwunu txako, u ku wamwamna; ni na ku wotisa, se awe u na ni xamula.

⁴U ti ti hayi awe mbimo yi ni nga va nga ditiko kani? Ni mahe ni tiziva, ngako u di ni wuzivi.

⁵I mani a nga veka tipimo ta ditiko mwendo wa m'ziva kani? Ni ku mwendo i mani a ngadi pima ngu ngoti kani?

⁶Tiphande ta dona ti tsikaretilwe ha ka txani kani? Mwendo i mani a nga veka dirigwi do khata,

⁷mbimo yile tinyeleti ta wuronga ti nga patana ti embelela, na votshe vanana va Txizimu va txi tsaka ngutu kani?

⁸ Niku mwendo i mani a nga bhiyela linene ngu matimba, mbimo yile mati ma nga thekelela me huma,

⁹ni mbimo yi ni nga ambeka linene ngu marefu, se ni txi li phutela ngu txidema kani?

¹⁰Mbimo yile ni nga ninga mlayo wangu ka linene, se ni txi li vekela matimba ni sikhoto,

¹¹ni txi khani: U nata kala hawa, u ngaye masoni kambe, mavimbi ako o thisa me ta phwatikela hawa kani?

¹²Mwendo kukhukhela u velekwa u ti nga rumela mabimbi-kutxa mwendo u kombile wuronga wukhalo wa wona,

¹³kasi ku wu txi ñola tikasani ka mafu, se vaonhi va txi zuzwa ka ona kani?

¹⁴Sotshe si fana ni dibumba aha ka txivango si txi nga syambalo;

¹⁵se liwoningo la txona la vayilela ka vaonhi, ni diwoko da kutikulisa da funyeka.

¹⁶Niku mwendo awe u wulete kala makhatoni ka linene, mwendo u hokile kutshimani ka hombe ngutu kani?

¹⁷Mwendo ma ti tumbulekisile kwako matimba a lifo, mwendo u woni matimba a mtsudi wa lifo kani?

¹⁸Mwendo ngu wuzivi wako u woni kuanama ka mafu kani? Ni zivise, ngako u txi tiziva totshe eto.

¹⁹Yi hani nzila ya mu litako ngu kona liwoningo kani? Se txidema, wu hani wukhalo wa txona,

²⁰kasi kuhokisa txidema mihinganoni, ni kuva u ziva tinzila ta nyumbani ka txona kani?

²¹Kha ditshuri, u ti zivile kukhukhela u velekwa, ni ku mtengo wa masiku ako mbwa hombe!

²²Mwendo u wulete kala sisangalani ka hunguva, mwendo u woni sisangala sa maralala,

²³ti to na ñola hambi mbimo ya kuxaniseka, ni ditshiku da kulwa ni da yimbi kani?

²⁴Yi hani nzila yile liwoningo li abanekako ka yona kani, se moya wa wutxani wu txi hangalaka ha mafuni kani?

²⁵I mani a nga tula nzila me tala mati, ni nzila ya kuphatima ka kudhindela,

²⁶kasi kunisa mati amu ku singako ni m'thu ni txiwulani ka kwa mbi na vathu;

²⁷kasi kunonisa mafu a txiwula ni a txisapa, ni kuthungisa mwasi wa wuphya kani?

²⁸Ina mati ma ni tate kani? Mwendo i mani a mahako mathotho a mwando kani?

²⁹Marigwi a mati mata ngu mndani ka txani kani? Niku i mani a mahako marigwi a mati a nzumani,

³⁰mbimo yile mati ma sisalako mu ka marigwi ni txitimwi ka kuhokoma ku txi oma kani?

³¹Mwendo u nga sikota kumaha Mbobo ya mtxhanu wa tinyeleti, mwendo kutxhatxha titxhini ta Oriyoni (tinyeleti) kani?

³²Mwendo kuhumisa tinyeleti ngu mbimo ya tona, ni kutsimbitisa txingwingwi ni vanana va txona kani?

³³Wa yi ziva awe milayo ya nzumani, mwendo u nga ziva mtamo wa sona ha mafuni kani?

³⁴Mwendo u nga guleta dipswi dako kala marefuni, kasi ku u txi welwa ngu mati amangi kani?

³⁵Mwendo u na dhana tinyangafula ku ta kha tona: Hiho hawa kani?

³⁶I mani a nga veka wutxhari mndani, mwendo i mani a nga ninga wuzivi mapimoni kani?

³⁷I mani a ku ni wutxhari wo balela marefu kani? Mwendo misava ya nzumani yi nga kwitimiswa ngu mani,

³⁸ngako lithulu li txi maha dibumba, se ni mabwinzi ma txi namarelana kani?

³⁹Ina ngonyamo ya mkati u nga yi xotela nyama, mwendo u nga malata nzala ya sigonyamwana,

⁴⁰ngako ti txi sisala mibhalani, na ti txi solela maphalani kani?

⁴¹I mani a ningaho magwana sakudya, mbimo yile sisondo sa ona si dilako ka Txizimu, si txi peperukela ngu kupwata sakudya kani?