Read chopi Jobe 40 Bible Online

Jobe 40 - chopi bible

Jobe 40

¹A to xamula kambe MKOMA ka Jobe, a txi khene:

²Ina mwendo kulwa ni wu wa Mtamo-wotshe ngu gondisa kani? Awu a kanetisanako ni Txizimu, a na xamule timhaka tiya.

³Sekoko Jobe a to xamula ka MKOMA, a txi khene:

⁴Wona taku kha ni nga wa txilo, ni na kuxamula txani ani kani? Ni tsiva txisofu txangu ngu dianza dangu.

⁵Ni wombile kumweko, kha ni na mbi xamula kambe; mwendo kambe kumbidi, kha ni na mbi ya masoni.

⁶Sekoko MKOMA a to xamula ka Jobe ngu mu ka txihuhuri, a txi khene:

⁷Tsanisa txiwunu txako, u ku wamwamna; ani ni na ku wotisa awe, se awe u na ni xamula.

⁸Ina mwendo u nga eyisa ditshuri dangu mwendo u na ni kona, u txi ti basisa kani?

⁹Mwendo u ni diwoko do nga da Txizimu, mwendo u nga bhonga ngu dipswi nga da txona kani?

¹⁰Ti bombise koko ngu kuenela ni kuguleka; u txi ti ambeka kuthaviseka ni wudhumo.

¹¹Tshakunuta txiviti txa kuhenya kwako, wonisisa votshe va kutikulisa, u txi va veka hahatshi.

¹²Wonisisa votshe va kutikulisa u txi va veka hahatshi, kambe peka vaonhi makhaloni kwawe.

¹³Va sise votshe amu ka lithulu; va sunge tikhohe txihunjani.

¹⁴Sekoko nani ni na kholwa kwako, taku dianza dako da txinene di ku thxatxhisile.

¹⁵[4]Wonisisa konkuwa, ni vangile nvuwu ni va nga awe, yi dyako mwasi kufana ni homu.

¹⁶Wona taku mtamo wa nvuwu wu txiwununi ka yona, se mtamo wa kona wu ka mrumbu wa yona.

¹⁷Yi txi ndiwita mkila wa yona, ngu nga mkedhari; misiha ya minenge ya yona, yo nga yi to lukwa.

¹⁸Marambu a yona ma fana ni mipopi ya suku; marambu a yona mo nga tiphande ta tisimbi.

¹⁹Yona nvuwu mthumo wo khata wa Txizimu; awu a nga yi va nga, a yi ningile matxhari a yona.

²⁰Kha ditshuri, sakudya yi si mana mimangoni, emo sotshe sihari sa txitinga si hungalako.

²¹Yi otela hahatshi ka mindonga ya mitsudi, yi sisala simovani ni mu ka madhaka.

²²Mindonga ya mitsudi ya yi tsivela ngu mitsudi ya yona; yi randelwa ngu mwasi wa txinambwana.

²³Wona taku mnambo wa thekelela, kambe yona kha yi tutumi, hambi Jordhani a txo wulela mkanani ka yona.

²⁴Ina mwendo va nga yi ñola yi txi va wona, mwendo kuhulela mkhalo thonvuni ka yona kani?