Read chopi Jobe 41 Bible Online

Jobe 41 - chopi bible

Jobe 41

¹ U nga dota ngwenya ngu tximemba, mwendo u nga sunga lidimi la yona ngu ngoti kani?

²U nga sikota kuhulela mkhalo thonvuni ka yona, mwendo u nga dhoda txisofu txa yona ngu mpa kani?

³Ina mwendo yi nga dilela kwako kani? Mwendo yi nga kukombela ku yi tsetsa kani?

⁴Ina ngwenya yi nga maha txitumelelano ni nawe, mwendo awe u na yi maha khumbi do gwita kani?

⁵U nga sakana ni ngwenya, nga yo va txinyana, mwendo u nga yi ningela ka mahorana ako kani?

⁶Vangana vako va nga maha m'buso ngu yona, mwendo va nga abanelana ngu yona vanyamabhindu kani?

⁷Ina u nga tshulela mmidi wa ngwenya ngu matxhari, mwendo msungo wa yona, ngu simemba sa vadoti kani?

⁸Hi nga sanzeka dianza dako txitimwi ka ngwenya, se alakanya taku, khu na mbi duketa kambe to nga eto.

⁹Wona taku, kuduketa kwako ku na thidhela; ina ni wammweyo masoni ka yona, kha na kuwa kani?

¹⁰Ni wammweyo wo dangahangela kuvhuka ngwenya; i mani koko waku a nga ema masoni kwangu kani?

¹¹I mani a nga khata e ni ninga, kasi ku ni na mtshumetela kani? Nguko asi si ku hahatshi ka nzuma, nzangu.

¹²Kha ni na mbi malala kuwombawomba ngu siro sa ngwenya, ni mtamo wa yona, hambi ngu zumbelo ya yona.

¹³I mani waku a nga runduwula didhowo da yona kani? I mani waku a nga wulela mkanani ka yona kani?

¹⁴I mani waku a nga tula titshaya ta ngwenya kani? Nguko madhawani ka makwasa a yona ka thisa.

¹⁵Magwagwarimba o banga a ngwenya ma tshurile ngutu, ma namarelani nga ma to lemwa ngu phula.

¹⁶Ma gwatamete ngutu ma txi namarelana, hambi ni simoyana kha si mani ko pinda.

¹⁷Ma txhavinyetani dimwani ni dimwani; ma bandani ngutu aha kaku, kha ma na ku abaniswa.

¹⁸Ngwenya yi txi wetshemula kuwoneka dituro, se maso a yona ma fana ni mikohe ya wuronga.

¹⁹Mkanani ka yona kuhuma sisase; emo ti humako ngu kona titshatsha.

²⁰Kuhuma wutshi ngu m'dhonvuni ka yona, ku nga wa khadi yo hala, mwendo ngu mu ka titshava ta hombe.

²¹Kuhefemula ka yona ku nga turisa makala; se ngu mkanani ka yona kuhuma dituro.

²²Mtamo wa yona wu ha thamoni; masoni ka yona hambi kuhenya ka tutuma.

²³Misuna ya nyama ya yona yi patani ngutu; msuna wu tsana ka wumwani, kha wu dekadeki.

²⁴Mbilu ya ngwenya yi bangi nga dirigwi, yi tsani nga dirigwi da txitshindo.

²⁵Yi txi khukha, hambi tindena ta dhudhumela; ngu mhaka ya kubhonga ka yona ta tsivala.

²⁶Ngako m'thu a txi yi thola ngu ditxhari, mseve kha wu doli, ni txiholoma, mwendo lingove.

²⁷Ka ngwenya, simbi i mwasi, ni koporo i ndonga yo sina.

²⁸Lingove kha li na ku yi tutumisa; marigwi a sibhalakaza ma wavalaka nga mafu.

²⁹Ku txi rinzetelwa marigwi, ka yona ngu nga mwasi, kambe yi seka kutuma ka tingove.

³⁰Hamrumbu ka ngwenya ku ni syamba sa titshoka ta mipa; ya barama txitimwi ka so thola nga ha ka lidhaka.

³¹Ya vhilusa mati o tshima, nga mo hala khadini; yi maha ti to linene li txi nga mafura ma halako.

³²Msana ka yona yi londetwa ngu dituro; kuhokoma ku txi pupuma nga kubasa ka wunvi.

³³Ha mafuni, kha ku nga ni txo fananiswa ni ngwenya, nguko yi mahisilwe kuva yi si thavi.

³⁴Ngwenya ya wona sotshe so guleka; ya fuma ka vanana va sotshe sihari sa kutikulisa.