Read chopi Jobe 6 Bible Online

Jobe 6 - chopi bible

Jobe 6

¹Sekoko Jobe a to xamula, a txi khene:

²O! I ti ku kupandiseka kwangu ngu ditshuri ko pinda, se kuxaniseka kwangu ku txi vekwa txikaloni!

³Nguko ngu ditshuri, ku da nemela ngutu, kupinda mtxhefa wa lineneni; ngu toneto ti mahako mapswi angu ma si pfisiswi.

⁴Nguko na fulwa ngu tingove ta wule wa Mtamo-wotshe, se moya wangu wa setwa wuxungu wa tona wo hisa; ni kuhenya ka Txizimu ka ni xomela matxhari.

⁵Ina yi nga dhuka yi emba mangwa ka mwasi wo nakana kani? Ina homu yi nga bhoma yi ti bhuwani kani?

⁶Ina ku nga dyiwa so pwata mnyu, i ku sa ditonde kani? Niku mwendo di nga tshamba dianda do basa kani?

⁷Moya wangu wa lamba kugwesa mapswi anu, nguko ma fana ni sakudya so ni venga m'busoni kwangu.

⁸Sikwangu i tiku ta maheka toneto! Ni kuva Txizimu txi ni ninga sile ni si verelako!

⁹Ni kuva Txizimu txi ti ti lavile ku ni peka, txi nawuluta dianza da txona txi ni hetisa!

¹⁰Kambe ni ndi na tsaka ni kupepa, kuxuphekani kwangu ni si ti tsetsi, nguko kha na lamba mapswi a Msawuleki.

¹¹Ngu wuhi mtamo wangu woza ni themba wona kani? Niku ngu ahi magwito angu, aku ni ku ngadi ni hanya kani?

¹²Ina mtamo wangu i nga va i ti mtamo wa dirigwi kani? Niku mwendo mmidi wangu i nga va wa koporo kani?

¹³Ina ni nga sikota ku ti vhuna nipune kani? Ina kha na tutumwa ngu sivhuno so tsana kani?

¹⁴Mngana a txi dingana kukombisa kupfela wule a xanisekako, hambi a di lekile ku ve ni txithavo, ka wule wa Mtamo-wotshe.

¹⁵Vanathu va ni amukete ngu wuviyaku, va nga txinambwana, nga mati a sinambwana maphwako.

¹⁶Si nga tshulelwa ngu marigwi a pheho, i kumo yi sisalako kona hunguva.

¹⁷Mbimo yile yi nyekiswako ngu lisani, ya hangalaka; se ngu kupfa kufutumela, ya mwalala ka wukhalo wa yona.

¹⁸Sitimela sa mati, sa leka tinzila ta sona; si tsula txizivani si txi ya lova.

¹⁹Avale va tsimbilelako Tema, va si wona, vaendi va Sabha va sikota ku si wona.

²⁰Va wisilwe tingana, nguko va ti ti ni kuthemba, msana keto va to mana dikhodho.

²¹Konkuwa mi fana navo; mi woni to mi dhukisa, mi thavile.

²²Ina eko ani ni ti nga khani kwanu: Mahani siningo kwangu ngu tithomba tanu kani?

²³Mwendo ku khani: Ni txhatxhiseni manzani ka mkhozisi kani? Mwendo kambe ku khani: Ni tiruleni manzani ka sidayi kani?

²⁴Ni gondiseni, se ni na malala; ni pimiseni tile ni nga onha.

²⁵O! Mapswi a ditshuri ma ni mtamo ngutu! Aniko nji txani txi xolako tximangalo txanu kani?

²⁶Ina mi nga dhuka mi mana mapswi o ni laya ngu ona, eko ditshuri da m'thu wo gwitelwa, di fanako ni moya kani?

²⁷Aniko, kukhata, mo xaxuvela tixolo txikulungu, mi dyelelwa, mi ningela walo mngana wanu.

²⁸Sekoko ngako mi txi wuyelwa, ni woneni; mi na wona to mwendo na womba makuhu masoni kwanu.

²⁹Tshumelani koko, ku nga veho kubiha; ina, wuyani, nguko mhaka yangu yi lulamile.

³⁰Ina ku nga va ku ti ni wubihi ka lidimi langu kani? Ina mkanani kwangu kha ku pfalisi wusiwana wangu kani?