Read chopi Jobe 7 Bible Online

Jobe 7 - chopi bible

Jobe 7

¹Ina m'thu kha nga yimbini txitimwi ka mafu kani? Ni masiku akwe hi nga ku nga masiku a txithumi kani?

²Kufana ni mhoti yi navelako mtsudi, ni ku nga txithumi txi verelako hakhelo ya txona,

³ngu mhaka yeto, ni ningilwe mitxima ya wukanganyisi kuva thomba yangu, kambe ni ningilwe wusiku wa xomulo.

⁴Sekoko ni txi otela ni khani: Eko ni na wuka mbimo muni kani? Wusiku wu laphile ngutu, na karala ngu ku phemberukela ha m'bhedhuni, kala kugwimba ka wuronga.

⁵Mmidi wangu wu ambate timbungu ni tiphorwa ta lithulu; didhowo dangu di bhandekete, da nyenyeza.

⁶Masiku angu ma tutuma ngutu, kupinda txhingani ya marungani, me mwalala ku si nga ni kuverela txilo.

⁷Alakanya taku wutomi wangu wu fana ni moya; maso angu kha ma na mbi ngadi me wona wunene.

⁸Maso a vale nkonku va ni wonako, kha ma na mbi ni wona kambe; maso ako ma nava txitimwi kwangu, aniko kha ni na mbi va ani kambe.

⁹Ku nga direfu di hangalakako di pinda, awule a relelako dithithani, kha na mbi dhuka e kwelela kambe.

¹⁰Kha na mbiswa e tshumelela nyumbani kwakwe kambe; ni wukhalo wakwe kha wu na mbiswa wu m'ziva.

¹¹Ngu maha ya eto, kha ni na mbi bundamisa txisofu txangu; ni na womba-womba kuxanisekani ka moya wangu; ni na ti bika kuxanisekani ka dihika dangu.

¹²Ina ani no va linene mwendo nyatudi, koza u ni vekela muwoneleli kani?

¹³Ni txo khani: M'bhedhu wangu wu na ni thavelela, ditaho dangu di na thavisa kuvilela kwangu!

¹⁴Sekoko wa ni xamalisa ngu miloro, ni ku ni tsivela ngu siwoniso;

¹⁵ngu konaho, muhefemulo wangu wu ndi na sawula kuhetiswa; ni kufa, kupinda marambu awa angu.

¹⁶Wutomi wangu na wu nyenya, nguko kha ni na mbi hanya kala kupinduka; khukha kwangu nguko, masiku angu mbukanganyisi.

¹⁷ Njitxani m'thu koza u txi mthemba, u veka kwakwe mbilu yako kani?

¹⁸U txi muendela mixo ni mixo, ni ku m'duka mbimo ni mbimo kani?

¹⁹Khu na mbi ni leka kala yihi mbimo, ni ku ni siya, niza ni mita lure langu kani?

²⁰Ngako ni ti onhile, ni na ku mahela txani, awe muwoneleli wa vathu kani? U mahete txani ku ni xanisa nga wo xotwa, kuva ti txi ni nemelela kani?

²¹U lamba kudivalela sihoheto sangu, u si thavisi wubihi wangu kani? Konkuwa, ni na otela lithuluni, se ngu mabimbi-kutxa u na ni lavetetela, aniko khu na mbi ni mana.