Read chopi Jobe 9 Bible Online

Jobe 9 - chopi bible

Jobe 9

¹Sekoko Jobe a to xamula a txi khene:

² Ngu ditshuri na tiziva taku ngu toneto; m'thu a nga ti emelisa kutxani ka Txizimu kani?

³Ngako u lava kulwa ni Txizimu, hambi tximwetxo ha ka 1.000 wa so maha, kha txi na mbi kuxamula.

⁴Txizimu txi ni wutxhari mbiluni, txona i nyamitamo ngutu; i mani a nga ti bangisa ka txona, e mana kuthutha kani?

⁵Txizimu ngu txona txi rurisako mimango, se tisika ta yona ti zinginika, yi si ti pfi, mndani ka kuhenya ka txona;

⁶atxile txi thavisako mafu ka wukhalo wa ona, se tiphande ta ona ti txi zinginika;

⁷txi wombako ka ditambo, se dona di si humi; kambe txi tsivela tinyeleti;

⁸atxi txokha txi gwimbako nzuma; kambe txi tsimbilako txitimwi ka linene;

⁹atxi txi nga va nga Txingwingwi, Nyezi, ni Tinyeleti ta mtxhanu ni timbidi, ni sotshe so tshima sa Wuphemba.

¹⁰Atxi txi vangako silo sa hombe, si si kotekiko kubalwa, ni sixamaliso saku kha si txhamuseleki.

¹¹Txizimu txa pinda ngu masoni kwangu, ni si txi woni; se txi tshumela, kambe kha ni txi pfi.

¹²Txa guleta txo maha; i mani a no txi maha txi txi tshumeta kani? I mani a no txi gela ku khene: Wo maha txani kani?

¹³Txizimu kha txi na mbi leka kuhenya ka txona; hahatshi ka txona, va nama votshe vavhuneteli va mabava.

¹⁴Ni nga sikotisa kutxani ku txi xamula ani kani? Mwendo kusawula mapswi o womba masoni ka txona kani?

¹⁵Hambi i tiku no va wo lulama masoni ka txona, nga ni si txi xamuli; kukhata, ka mlamuli wangu, ni ndi na kombela wumbilu.

¹⁶Hambi i ti ku no dhana, Txizimu, txi ni xamula, hambi keto, ni si kholwi ti to txi engisa dipswi dangu.

¹⁷Nguko txa ni phatulela ngu txihuhuri, kambe txi engetela silonda sangu ku si na txivangelo.

¹⁸Txizimu kha txi ni tumeli ni kuhefemula; aniko txa ni tata ngu kubava.

¹⁹Se ngu mule ka mitamo, txona txi ni mtamo; se amu ka kulamula, i mani a nga ni fananisako natxo kani?

²⁰Ngako ni txo ti emela, txisofu txangu txi na ni kona; ngako ni txo ti womba mlulami, ni na nuwelwa wubihi.

²¹Hambi ni ti hetisekile, kha ni thembi dihika dangu; na txhipisa dipswi dangu.

²²Ngu toneto, mhaka ngu yiya; ani ni khani txa fuvisa wo lulama ni m'bihi.

²³Txi daya kukwapwa ngu txikuluveta, sekoko txa seka kutiemela ka vo mbi na mnandu.

²⁴Mafu ma ningetwe manzani ka m'bihi; Txizimu txa fenengeta tikhohe ta valamuli; ngako i si nga txona koko, se i mani kani?

²⁵Masiku angu ma tutuma ngutu kupinda nyalivilo; ma tutumile, kha ma zivi ka nga wona wunene.

²⁶Ma pinda kufana ni sitimela sa matanga, kufana ni digama di ti rinzako ka mpfimba.

²⁷Ngako ni txo khani: Ani ni na leka kutitsetsa kwangu ni na txitxa khohe yangu, ni kombisa kutsaka.

²⁸Na thava kupanda kwangu, nguko na tiziva to khu na mbi ni maha wo mbi na mnandu.

²⁹Se ngako i ku ani m'bihi, ni na thumela txani walo kani?

³⁰Hambi ni nga samba ngu mati a hunguva, ni sawulekisa manza angu ngu sephu.

³¹Ni ka toneto, Txizimu txi na ni pfhokometa madhakani, se syambalo sangu sipune si na ni nyenyeza.

³²Nguko txona hi nga m'thu kufana ni nani, awu ani ni txi mxamula, ni kuya lamulwa.

³³A walo wo ema hagari kwathu, wo a nga veka dianza txitimwi kwathu vavambidi.

³⁴Txizimu txi na thavise ndonga ya txona txitimwi kwangu, kambe ni nga dhukiswe ngu kuthisa ka txona.

³⁵Sekoko ni na womba-womba, kambe kha ni na mbi thava; nguko konkuwa, kha ni nga ni tangu.