Read chopi Masalmo 10 Bible Online

Masalmo 10 - chopi bible

Masalmo 10

¹MKOMA, nji txani u txi emela kule kani? Nji txani u txi sisala ka sikhati so xanisa kani?

²Kutikulisani kwawe, vabihi va xanisa sisiwana; va na bzwetwe ngu milawu yi va nga riya.

³M'thu wa kubiha wa ti dhumisa ngu minavelo yakwe; m'thu wa makolo wa ruketela ni kunyenya MKOMA.

⁴Kutikulisani kwakwe m'thu wo biha kha khatali ngu MKOMA, a khene: “Txizimu kha txi mahi txilo ngu kuhenya ka txona.” Ene a pimisa tito; Txizimu kha txi nga ho.

⁵Mithumo yakwe ya nyawula txotshe txikhati. Kulamula kwako, MKOMA, ku txitimwi ngutu kwakwe; ene wa poyilela valala vakwe votshe.

⁶Mbilu yakwe ya womba yi txi kha yona: “Kha ni na mbi nga va ni kuwiswa, kha ni na mbi welwa ngu dikhombo, ni ditshiku ni da dimwedo.”

⁷ Txisofu txakwe txi tate ngu kuruketela, ni makuhu ni sipoyilelo; kuwombawombani kwakwe ku ni tshofu ni wubihi.

⁸Wa khalahatsha a txi baramela vathu hafuhi ni miti; wa sisala kasi kudaya vavanene; maso akwe ma solelela txisiwana.

⁹A fana ni ngonyamo yi ku diphalani ka yona; ene wa riya milawu kasi kubzweta txisiwana; mbimo yi a txi bzwetako wa txi ruruvisa, e txi ndinda ngu mlawu wakwe.

¹⁰Wa bukhwama, a txi mbzwingamela, a txi pfinya ngu syala sakwe avale va ku ni dikhombo.

¹¹Ngu msana, a womba mbiluni kwakwe, a txi khene: “Txizimu txa divala, txa sisa khohe ya txona, kha txi woni txilo.”

¹²Khukha u txi ema, MKOMA, va tsayise! U nga divale sikulungu!

¹³Ngu kutxani m'bihi a txi kunyenya, awe Txizimu, a txi womba mbiluni kwakwe, a txi khene: “Txizimu kha txi na mbi tsayisa?”

¹⁴Aniko awe wa wona kupandiseka ni kuxaniseka, totshe wa ti wonisisa, ni kukhatala ngu tona. Va tutumela kwako ava vo mbi na m'vhikeli ni va vo felwa; awe ngawe m'vhuneteli wawe.

¹⁵Fuvisa mtamo wa vabihi ni wa vaonhi; tsayisa kubiha kwawe, kala kuza ve fuva votshe.

¹⁶MKOMA wa fuma kala kupinduka; mahedheni ma na humiswe ditikoni kwakwe.

¹⁷MKOMA, engisa mikombelo ya sisiwana; si mbuwetele u txi si amukela.

¹⁸Lamulela ava vo felwa ngu vaveleki, ni va va xanisekako, ku nga ve ni wammweyo m'thu wa mafu awa, a tshumelako a txi va xanisa.