Read chopi Masalmo 101 Bible Online

Masalmo 101 - chopi bible

Masalmo 101

¹Disalmo da Dhavhidha Ni lava kuembelela lirando ni kululama; ni txi embelela ngu ngawe, MKOMA.

²Ni lava kutsimbila ngu nzila yo lulama. U na ni hingeta ditshiku muni? Nyumbani kwangu ni na hanya ngu mbilu ya kuthutha;

³ni na leka yotshe mithumo yo biha. Na nyenya mithumo ya vabihi; kha ni na mbi tumela kusengela navo.

⁴Va na zumbe kule ni nani avale va ku ni mi alakanyo yo gombonyeka; kha ni lavi kuziva ta vale va mahetelako to biha!

⁵Awu a lengako ni kusingeta mmwani m'thu, ni na mfuvisa ngu nyahele; kha ni na mbi timisela wa kutiguleta ni kutikukumukisa!

⁶Ni na amukela avale vo sawuleka ha mafuni kasiku ve hanya ni nani; ni na tumela kuthumelwa ngu wule a ku ni mahanyelo amanene dwe.

⁷Nyumbani kwangu kha ku na mbi zumba vakanganyisi; kha ni lavi va makuhu masoni kwangu!

⁸Ditshiku ni ditshiku ni na lovisa votshe vale va mahako kubiha ha ditikoni; kasi kufuvisa sotshe sigevenga didhoropani ka MKOMA!