Read chopi Masalmo 103 Bible Online

Masalmo 103 - chopi bible

Masalmo 103

¹Disalmo da Dhavhidha Ni lava kudhumisa MKOMA ngu wotshe moya wangu; ngu yotshe mbilu yangu ni lava kudhumisa Txizimu txo sawuleka.

²Ni lava kudhumisa MKOMA ngu wotshe moya wangu, ni si divali ni txa tximwetxo ka sihiwa sakwe.

³Ngene a divalelako sotshe sionho sangu a txi ni hanyisa ka yotshe mipando yangu;

⁴ngene a ni hulukisako dithowoni, a txi ni xayisa ngu lirando ni litsako;

⁵ ngene a ni tatako ngu sihiwa kuhanyani kwangu e wuseta wuphya wangu, wu fana ni wa digamba.

⁶MKOMA wa vhikela ngu kululama votshe vale va xaniswako.

⁷A zivisile tinzila takwe ka Mosi e zivisa mithumo yakwe ka vanana va ka Israyeli.

⁸ MKOMA a tate ngu wumbilu ni wunene; wa timisela na a di tate ngu lirando.

⁹Kha khali a txi hi kawuka yotshe mbimo, ni dikhulo dakwe kha di simami kala kupinduka;

¹⁰kha hi tshumeteli madingano ni sionho sathu kambe kha hi tsayisi madingano ni sionho sathu.

¹¹Nguko, nga ti nzuma yi ku kule ngutu ni mafu ngu toneto ni lona lirando lakwe ka vale va mthavako.

¹²A tsulisa kule sihambunyeto sathu, nga ti Wutxani ku ku kule ni mswa-ditambo.

¹³MKOMA mbwa kuthutha ka vale va m'thavako kufana ni tate wo thutha ka vanana vakwe.

¹⁴Ene wa tiziva ti athu hi nga wumbiswa tona; wa ti alakanya ti to athu hi lithulu dwe.

¹⁵Kuhanya ka m'thu kufana ni mwasi; makhato a kona ma fana ni kumila ka txiluva txa thembweni,

¹⁶aniko, mbimo yi diphuho di txi futetako, txa mora, ku si zivaneki kambe ahawa txi nga ti kona.

¹⁷Aniko lirando la MKOMA kha li nga ni magwito ka vale va m'thavako kululama kwakwe kha ku na magwito ka liveleko ni liveleko,

¹⁸ka vale va londetako txitumelelano txakwe va si divaliko kuvekisa sirumo sakwe.

¹⁹MKOMA a vekile txikhalo txakwe txa wukoma tinzumani ene wa fuma txitimwi ka sotshe si si kuho.

²⁰Dhumisani MKOMA, anu tingelozi takwe, anu sirumwa sakwe sa mtamo, anu mi londetako sileleto sakwe ni ku mu engisa.

²¹Dhumisani MKOMA anu mabutho a nzumani, anu sithumi sakwe mi mahako kuranda kwakwe!

²²Dhumisani MKOMA, anu siwumbwa sakwe sotshe, ka otshe makhalo a mfumo wakwe! Ni lava kudhumisa MKOMA ngu wotshe moya wangu!