Read chopi Masalmo 106 Bible Online

Masalmo 106 - chopi bible

Masalmo 106

¹ Dhumisani MKOMA! Bongani MKOMA, nguko ene mbwa mnene, nguko lirando lakwe kha li nga ni magwito.

²I mani a sikotako kuxawutela mithumo ya hombe ya MKOMA? I mani a sikotako kupfalisa wotshe wudhumo wakwe kani?

³Va katekile avale va vekisako milayo yakwe avale va mahako kululama yotshe mbimo.

⁴Ni alakanye, MKOMA, ngu lirando li u ku nalo ka vathu vako. Ngono u ta ni hanyisa,

⁵kasiku ni wona kuhumelela ka vale u nga va sawula, ni txi tsakela makatekwa a vathu vako, ni txi ti guleta kumweko ni vale va kulumbako.

⁶Hi onhile kufana ni vakale vathu; hi onhile, hi mahile kubiha.

⁷ Vatate vathu, mbimo yi va nga ti Egipta, kha va khatala ngu sidiwukiso sako; kha va alakanya lirando lako la hombe aniko va kuwukete, hafuhi ka linene lo Bhilivila.

⁸Aniko Txizimu txi va hanyisile, kasi kudhumisa ditina da txona ni kumaha ti to wu txi ziwa mtamo wa txona.

⁹Txizimu txi kawukile Linene lo Bhilivila, se linene li txi phwa. Txi va txhatukisile ngu ha kuetani ka linene, va txi nga vo tsimbila txiwulani.

¹⁰Ngu toneto, txi va hulukisile ka vale va nga ti va venga txi va tirula mtamoni ka valala.

¹¹Mati ma mitile valala vawe; ve fa, ku si sali ni wammweyo.

¹²Sekoko va to kholwa ka mapswi a Txizimu ve txi dhumisa ngu kuembelela tindando.

¹³Aniko va kuluvetile ve divala mithumo ya Txizimu se kha va rinzela kuwona makungo a txona.

¹⁴Va di txiwulani, va to xengwa ngu minavelo yo biha, ve duka Txizimu kona.

¹⁵Txizimu txi va ningile asi va nga kombela, aniko txi va pekile ngu mtungu mimindini kwawe.

¹⁶Se va di wugoveloni kwawe, va to bavela Mosi ni Aroni, msawuleki wa MKOMA.

¹⁷Se mafu ma to tuleka, me mita Dhatani; Abhiramu ni ngamu yakwe va mitilwe ni vona;

¹⁸Ku to relela mndilo wu txi wa txitimwi kwawe, wu hisa votshe avale va nga txi mahetela to biha.

¹⁹Mmangoni ka Horebhi va mahile dirole da nzalama ve khozela txithombe txile txa simbi yo nyivilikiswa;

²⁰va to leka Txizimu, txi i ku wudhumo wawe, ve khozela txithombe txa txihari txi txi dyako mwasi.

²¹Va divate Txizimu, Muhanyisi wawe, atxi txi nga va mahela sixamaliso ditikoni ka Egipta.

²²Txi nga va mahela sidiwukiso ditikoni ka Kamu ni simaha so thisa lineneni ko Bhilivila.

²³Txizimu txi pimisile ku va lovisa. Aniko, Mosi, msawuleki wa Txizimu, a va kombelete, kasiku Txizimu txi kuthutha, txi si va lovisi.

²⁴Kha va khatala ngu ditiko dile do tshura, kambe kha va kholwa ka sithembiso sa Txizimu.

²⁵Va to khata kungungurukela va di matendani kwakwe, ve eyisa sileleto sa MKOMA.

²⁶Ngu toneto, Txizimu txi to gula diwoko, txi xambanya ti to txi na va leka va txi fa txiwulani,

²⁷ti to txi na hangalasa vanana vawe hagari ka vamatiko, txi va hangalasa hagari ka mifumo.

²⁸Se va to khozela Bhahali-Peyori, va txi dya timhamba to mahelwa vafi.

²⁹Ngu simaho sawe so biha va wusile kuhenya ka Txizimu, se ngu mhaka yeto mtungu wu hangalakile hagari kwawe.

³⁰Konako ku humelete Finiyasi a txi va lamula se mtungu wu to guma.

³¹Mhakeyo yi mahile ti to ene e maneka i di wo lulama awu a no simama e alakanywa ka liveleko ni liveleko yotshe mbimo.

³²Va to henyisa Txizimu kambe milongani ka Meribha, se ngu mhaka yawe, Mosi a tsayisilwe,

³³nguko va m'henyisile Mosi aha koza, e womba-womba mapswi o mbi lulama.

³⁴Kha va fuvisa vathu va matiko, avava MKOMA a nga ti va rumile ku va fuvisa,

³⁵se aniko va to ti patanisa kumweko navo, ve tekelela mtumbuluko wa mahanyelo awe;

³⁶ve khozela sithombe sawe, asi si nga va khuvekisa.

³⁷ Va ti phaxa ngu kuningela vanana vawe vavafana ni vamahorana ve va maha mhamba ka ona madhimoniyo.

³⁸ Va theketile mnoha wo mbi na mnandu, mnoha wa vanana vawe va vafana ni mahorana, ve phaxela ngu wona ka sithombe sa Kanana se ka toneto va nyenyezisile ditiko.

³⁹Ka toneto ni vona va ti nyenyezisile ngu mithumo yawe ve maneka va sa thembeka ka Txizimu.

⁴⁰ Ngu toneto, MKOMA a to henyela vathu vakwe, e tsukula vathu va i kuthomba yakwe.

⁴¹A va ningete mtamoni ka vamatiko, ve fumelwa ngu vale va nga ti va vengela.

⁴²Vona va xanisilwe ngu valala vawe, ve mahwa tikhumbi tawe.

⁴³Sikhati so tala MKOMA a va hulukisile, aniko vona va eyisile makungo akwe, ve ti beta ngutu mu kubihani kwawe.

⁴⁴Kambe MKOMA, mbimo yi a nga va wona va txi pandiseka, e engisa kudila kwawe,

⁴⁵a to alakanya txitumelelano txi a nga maha navo e telwa ngu wusiwana navo, nguko lirando lakwe nda hombe.

⁴⁶Ngu toneto, a mahile ti to va ka Israyeli ve pfelwa wusiwana ngu vale va nga va maha tikhumbi.

⁴⁷ Hi hanyise, MKOMA, Txizimu txathu! Hi humise hagari ka vamatiko, u txi hi sengeleta, kasi ku hi txi kubonga, Txizimu txo Sawuleka hi txi kutsakela ngu ku kudhumisa.

⁴⁸A na bongwe MKOMA Txizimu txa Israyeli, konkuwa ni yotshe mbimo! Votshe vathu va na wombe va txi kha vona: “Amen!” Dhumisani MKOMA!