Read chopi Masalmo 108 Bible Online

Masalmo 108 - chopi bible

Masalmo 108

¹Disalmo da Dhavhidha. Ndando. Mbilu yangu yi ti lulamisete, Txizimu; yi ti lulamisete ku kudhumisa ngu tindando! Wuka, awe moya wangu!

²Wukani awe haripa ni nawe txitende! Ni lava kuwusa wuronga!

³Ni na bonga, hagari ka vathu, MKOMA, ni na embelela wudhumo wako hagari ka mifumo.

⁴Wunene wako wu gulekile ngutu kupinda nzuma ni kuthembeka kwako ka pinda marefu.

⁵Txizimu, kombisa wuhombe wako nzumani u txi kombisa mtamo wako ha mafuni!

⁶Amukela mkombelo wathu, u hi hanyisa ngu diwoko dako da txinene! Kasiku vathu va u va randako ve hanyiswa!

⁷Txizimu txi wombile nyumbani ka txona ko sawuleka, txi txi kha txona: “Ni na abanisa Sikemi ngu litsako ni txi pima ditheka da Sukote!

⁸Gileyadhi ni Manasi va ni lumba; Efrayime njigoko txa msungo wangu se Judha i ndonga yangu ya wukoma.

⁹Mowabhi i mkamba wu ni sambelako ka wona; ni txitimwi ka Edhomi ni na kandetela ngu disandazi dangu, ni na giya ngu kuxula Vafilista.”

¹⁰I mani a no ni yisa ka didhoropa do tsana kani? I mani a no ni heleketa Edhomi kani?

¹¹Ina awe, Txizimu, u to hi leka kani? Ina khu na mbiswa u pangalata mabutho athu a tiyimbi, kani?

¹²Hi vhune kuxula valala vathu, nguko txivhuno txa vathu kha txi nyawuli.

¹³Ngu kuvhunwa ngu Txizimu hi na xula; txona txi na ganyatela ngu mikondo valala vathu.