Read chopi Masalmo 115 Bible Online

Masalmo 115 - chopi bible

Masalmo 115

¹U nga dhumise athu MKOMA, u nga dhumise athu, aniko dhumisa ditina dako da wudhumo, ngu mhaka ya lirando lako ni kuthembeka kwako!

²Nguko, vamatiko va nga simama ve wotisa, va txi kha vona: “Txi hani Txizimu txanu kani?”

³Aniko Txizimu txathu txi nzumani; txa maha totshe ti txi ti lavako.

⁴ Sizimu sa vamatiko i silivhela ni nzalama, sithombe so khandwa ngu manza awe:

⁵Si na ni txisofu, aniko kha si wombawombi; si na ni maso, aniko kha si woni;

⁶si na ni tinzeve, aniko kha si engisi, si na ni thonvu, aniko kha si pfi kubhumula,

⁷si na ni manza, aniko kha si gwesi txilo; si na ni mikondo, aniko kha si tsimbili, ngu mkanani ka sona kha ku humi dipswi!

⁸Avale va si wumbako, ve tshumela ve themba ka sona va na fane naso sona sithombeso.

⁹Anu Vaisrayeli, thembani MKOMA! Nguko ene ngene Mvhuni ni Muvhikeli wako.

¹⁰Nyumba ya Aroni, themba MKOMA! Nguko ene ngene Mvhuni ni Muvhikeli wako.

¹¹Anu mi kholwako ka Txizimu, thembani MKOMA! Nguko ene ngene Mvhuni ni Muvhikeli wanu.

¹²MKOMA a hi khumbute, se e hi katekisa! A na katekisa ngamu ya Israyeli, a na katekisa nyumba ya Aroni,

¹³ a na katekisa vale va kholwako ka MKOMA, vavadotho ni vahombe.

¹⁴MKOMA a na andise liveleko lanu, kumweko ni liveleko la vanana vanu!

¹⁵MKOMA, a nga va nga mafu, a na mi katekise, anu motshe!

¹⁶Nzuma yi lumba MKOMA, aniko mafu a ma ningete ka vanana va vathu.

¹⁷Ava va nga fa kha va dhumisi MKOMA, hambi vale va relelako ka wukhalo wo malala.

¹⁸Aniko athu, hi hanyako, hi na dhumisa MKOMA, kukhukhela konkuwa kala kupinduka. Dhumisani MKOMA!