Read chopi Masalmo 119 Bible Online

Masalmo 119 - chopi bible

Masalmo 119

¹Va katekile vale va tsimbilako ngu nzila yo lulama, ava va hanyako madingano ni Mlayo wa MKOMA.

²Va katekile avale va xayisako sileleto sakwe, va mlavako ngu yotshe mbilu,

³Ava va si mahiko kubiha, va tsimbilako tinzilani ka MKOMA.

⁴MKOMA, awe u hi ningile milayo yako, u txi hi gela ti to hi yi xayisa ngu yotshe mbilu.

⁵Ani na ti dhunda ngutu kuzumba ni di tsani nzilani ko thembeka, ni xayisa milayo yako!

⁶Sekoko kha ni na mbi wa tinganani, ngako ni txi vekisa sirumo sako.

⁷Ni na sikota ku kudhumisa ngu mbilu ya yinene, ngako ni di gondile mithetho yako yo lulama.

⁸Ni na xayisa milayo yako! U nga ni leke ngu nyalehe!

⁹Di na sikotisa kutxani dijaha kululamisa nzila ya wutomi wa dona kani? Ngu kuva di txi xayisa sileleto sako!

¹⁰Ani na ti lava ku kuthumela ngu yotshe mbilu; u nga ni leke ni txi hambana ni sirumo sako.

¹¹Ni vekile mbiluni kwangu mahungu ako, kasi ku ni si ku onheli.

¹²Bongwa, MKOMA! Ni gondise milayo yako!

¹³Ni na wuyelela kuhuwelela ngu dipswi do pfala yotshe mithetho yi u nga yi womba ngu txisofu txako.

¹⁴Na tsaka ngutu ngu kulondisa milayo yako kupinda kumana totshe tithomba.

¹⁵Ni na alakanya sirumo sako, ni txi khatalela tigondo tako.

¹⁶Ni na tsaka ngu milayo yako; kha ni na mbi divala mithetho yako.

¹⁷Ninga txithumi txako wutomi wawungi se ani ni na vekisa mithetho yako.

¹⁸Tula maso angu, kasiku ni wona sidiwukiso sa mlayo wako.

¹⁹Ani ni mpindi ka diya ditiko; u nga ni sisele sirumo sako.

²⁰Moya wangu wa karateka yotshe mbimo, ngu kulava kuziva mithetho yako.

²¹Awe wa kawuka avale va ti guletako; avale va ti vangelako dikhombo ngu ku ti hambanisa ni sirumo sako.

²²Ni ponise ka siruko sawe ni sinyenyo sawe, nguko na xayisa sileleto sako.

²³Vathu va mtamo va tshangana, va txi ni mahela txikungo, aniko ani, txithumi txiya txako, ni na alakanya milayo yako.

²⁴Milayo yako ya ni tsakisa, ngu yona yi ni ningako wusungukati.

²⁵Ni gumile mtamo, ni txi wa hahatshi; wusa kambe mtamo wangu, madingano ni txithembiso txako.

²⁶Ni ti tshanzile kwako totshe ti ni nga ti maha, se awe u ni xamute; ni gondise milayo yako!

²⁷Ni ninge mapimo a kulondeta sileleto sako, se ani ni na alakanya mithumo yako ya kuxamalisa.

²⁸Moya wangu wa dila ngu kuxaniseka; ni tsanise, madingano ni txithembiso txako.

²⁹Ni hambukise ka tinzila ta makuhu u txi ni vhuna kuhanya ngu mlayo wako.

³⁰Ni sawute kulondeta nzila ya ditshuri; ni xambanyile kulondeta mithetho yako.

³¹MKOMA, ni londetile milayo yako; u nga ni leke niwa tinganani!

³²Ni na khutalela kuvekisa sirumo sako, nguko atiya ti na ni ninga wuzivi wa hombe.

³³MKOMA, ni gondise kuziva nzila ya sileleto sako; kasiku ni na si xayisa kala magwito.

³⁴Ni ninge mapimo, kasiku ni xayisa mlayo wako; ni na wu vekisa ngu yotshe mbilu yangu.

³⁵Ni ninge kutsimbila ngu nzila ya sirumo sako, nguko ngu sona si ni tsakisako.

³⁶Ni ninge mbilu ya kuranda sileleto sako i si nga timbiti ta kuranda tithomba ta ha mafuni.

³⁷Vhikela maso angu ti to ma si woni wukanganyisi, se ni wuse ni tsimbila ngu nzila yako.

³⁸Tsanisa kwangu, txithumi txako, txithembiso txako, txithembiso txi u txi mahako ka vale va ku thavako.

³⁹Ni hulukise ka siruko si ni si thavako, nguko kulamula kwako ku lulamile.

⁴⁰Wona ti ni randisako tona milayo yako; ni hanyise, nguko awe u lulamile!

⁴¹MKOMA Txizimu, wumbilu wako wu nate kwangu; u txi ni hanyisa madingano ni txithembiso txako.

⁴²Konako ni na sikota kuxamula avale va ni ruketelako, nguko ni themba dipswi dako.

⁴³Ni ninge kuwomba ditshuri yotshe mbimo, nguko ani ni themba sileleto sako.

⁴⁴Otshe masiku ni na xayisa mlayo wako, ni na wu vekisa yotshe mbimo, kala kupinduka.,

⁴⁵Kambe ni na hanya ngu kutxhatxheka, nguko ni londetile sileleto sako.

⁴⁶Ni na nuwela milayo yako ka vafumeli kuwalo ni wammweyo a no ni wisa tingana.

⁴⁷Milayo yako ya ni tsakisa ngu toneto na yi randa.

⁴⁸Sirumo sako na si xonipha ni ku si randa; ni na zumba ni txi alakanyela mlayo wako.

⁴⁹Alakanya dipswi di u nga ni gela, ani txithumi txako; dipswi donedo di ni ningile kuthemba.

⁵⁰Kupandisekani kwangu dona di mahile tximbuwetelo txangu, nguko txithembiso txako txi ni ningile kuhanya.

⁵¹Vathu vo ti guleta va ni poyilete ngutu; hambi keto kha na hambuka ka mlayo wako.

⁵²MKOMA, ni khumbute malamulelo ako a kale se ka ona, ni mani ku ti thavelela.

⁵³Na pandiseka mbiluni kwangu, ngako ni txi wona vabihi va si khatali ngu milayo yako.

⁵⁴Milayo yako ya ni ninga kuthula tindando, ka diya ditiko ani ni ku mpindi wa nzila.

⁵⁵Ni wusiku, na kualakanya, MKOMA, kasiku ni xayisa mlayo wako.

⁵⁶Ni mahile tiya ani, nguko ni xayisile mlayo yako.

⁵⁷Awe MKOMA, ngawe u kuthomba yangu ani ni xambanya kuvekisa mithetho yako.

⁵⁸Na kukombela ngu yotshe mbilu yangu: Telwa ngu wumbilu ngu ngani madingano ni ti u nga thembisa.

⁵⁹Ni manekile ni txi pimisela mahanyelo angu, ni tshumete ni londisa milayo yako.

⁶⁰Ni kuluvetile, kha na swela kuvekisa sirumo sako.

⁶¹Vathu vo biha va ni riyete mlawu, aniko ani kha ni divali mlayo wako.

⁶²Hagari ka wusiku na wuka ni txi kudhumisa ngu mhaka ya mithetho yako yo lulama.

⁶³Na ti tshanganisa ni vale va kholwako kwako, ni vale va xayisako sileleto sako.

⁶⁴MKOMA, mafu ma tate ngu lirando lako: Ni gondise milayo yako!

⁶⁵MKOMA, u ni xayisile ta tinene ani txithumi txako: U mahile madingano ni kuthembisa kwako.

⁶⁶Ni gondise kululama kha kwati, ni wuzivi, ina, nguko ni khotwe ka milayo yako.

⁶⁷Mbimo yiya ni nga sinzi kuxaniseka, ni ti lekile nzila ya yinene; aniko konkuwa na londeta dipswi dako.

⁶⁸Awe u wamnene kambe u mkatekisi; ni gondise sileleto sako.

⁶⁹Vathu vo ti kulisa va luka makuhu ve ni lumbeta; aniko ani ni na vekisa sileleto sako ngu yotshe mbilu yangu.

⁷⁰Timbilu tawe ti bangile, kha va engisi, aniko ani na tsaka ngu mlayo wako.

⁷¹Ndinene ni nga mana kutsayiswa, kasi ku ni gonda silayelo sako.

⁷²Mlayo wu u nga ni ninga, kwangu wu ni lisima ngutu kupinda[1] tithomba tatingi ta nzalama mwendo ta silivhela.

⁷³Ani u ni vangile, u txi ni wumba ngu manza ako; ni ninge mapimo, kasiku ni gonda sirumo sako!

⁷⁴Avale va ku dhumisako va na tsaka, ngako va txi ni wona, nguko va na themba dipswi dako.

⁷⁵MKOMA, ani na tiziva ti to mithetho yako nja yinene khu hoxisi, ngako u txi ni tsayisa.

⁷⁶Lirando lako li na ni thavelele, madingano ni dipswi di u ngadi womba ka txithumi txako!

⁷⁷Ni kombe wumbilu wako se ni na hanya, nguko mlayo wako, wa ni tsakisa.

⁷⁸Vatseketseli va na xowokiswa ngu tingana, nguko va ni xupha ni si nga ni txionho; ani ni na pimisela sileleto sako.

⁷⁹Va nate kwangu avale va ku xoniphako, avale va zivako sileleto sako.

⁸⁰Mbilu yangu yi nave ya kuhetiseka ngu kuvekisa milayo yako, kasiku ni si wi tinganani.

⁸¹Moya wangu wa navela ngutu kuhanyiswa ngu ngawe; nguko ani ni themba dipswi dako!

⁸²Maso angu ma rinzela kuwona kutatiseka ka txithembiso txako se ani koko ni to khani: “U na ni thavelela yihi mbimo kani?”

⁸³Ani ni kumbile kufana ni msava wa kudivalwa txithatheni, aniko kha na divala milayo yako.

⁸⁴I mbimo muni ni ku ngadi ni txi na rinzela kani? U na lamula mbimo muni vale va ni xanisako kani?

⁸⁵Va kutiguleta, avale va si khataliko ngu milayo yako, va kete maphala masoni kwangu.

⁸⁶Yotshe milayo yako nja ditshuri; ni vhune kulwa ni vale va ni xanisako ngu ku ni singeta.

⁸⁷Kudotho va ti lava ku ni fuvisa ha mafuni niko kha ni zivi kueyisa sileleto sako.

⁸⁸Ni hanyise ngu wumbilu wako, se ni na vekisa milayo yi u ni gelako.

⁸⁹Dipswi dako di tsani nzumani awe MKOMA, kala kupinduka.

⁹⁰Kuthembeka kwako ku tsani ka liveleko ni liveleko, u mahile mafu me zumba ma di tsani.

⁹¹Sotshe si ho kala nyamsi, ngu kurumwa ngu ngawe, nguko sotshe si thumela awe.

⁹²Idiku mlayo wako wu ti si ni tsakisi, nga ni di fite kale kupandisekani kwangu.

⁹³Kha ni na mbi dhuka ni divala sileleto sako, ina, nguko u ni hanyisile ngu sona.

⁹⁴Ni hanyise nguko ni wako ani na londeta sileleto sako!

⁹⁵Avale va mahetelako kubiha va lava ku ni fuvisa, aniko ani ni na alakanyela sileleto sako.

⁹⁶Ni gondile ti to sotshe si ni magwito, aniko milayo yako yi anamile ngutu.

⁹⁷MKOMA, mlayo wako na wu randa ngutu! Na wu alakanyela otshe masiku.

⁹⁸Sirumo sako yotshe mbimo si ni nani, se sa ni ninga kuziva ngutu kupinda valala vangu.

⁹⁹Na pimisa ngutu kupinda votshe vagondisi vangu, nguko ni zumba ni txi alakanya ngutu sileleto sako.

¹⁰⁰Ngu toneto, na engisa ngutu kupinda madhota, nguko na xayisa sileleto sako.

¹⁰¹Ni hambukile ka totshe tinzila to biha, kasiku ni xayisa mithetho yako.

¹⁰²Txima kha ni zivi kueyisa mithetho yako, nguko ngawe u ni gondisako.

¹⁰³Mapswi ako ma tshamba ngutu; ma lombela ngutu kupinda wulombe!

¹⁰⁴Ngu sileleto sako ni gondile kupima; ngu kota yeto, na nyenya totshe tinzila ta makuhu.

¹⁰⁵Dipswi dako i liwoningo la mikondo yangu, dilambu da nzila yangu.

¹⁰⁶Ni xambanyile ni tsanisa:[2] Ti to ni na vekisa mithetho yako yo lulama.

¹⁰⁷MKOMA, ni ha kupandisekani ka hombe; ni hanyise kota kuthembisa kwako!

¹⁰⁸MKOMA, engisa mkombelo wangu wa kubonga, ni gondise mithetho yako.

¹⁰⁹Wutomi wangu wu ha phangoni yotshe mbimo, aniko kha ni divali mlayo wako.

¹¹⁰Avale va mahetelako kubiha, va ni riyete ngu mlawu aniko ani kha ni divali sileleto sako.

¹¹¹Thomba yangu ya yotshe mbimo ngu sileleto sako, nguko sa tsakisa mbilu yangu.

¹¹²Mbilu yangu yi pimisile kuxayisa milayo yako; eyo yi na va hakhelo yangu kala kupinduka.

¹¹³Na nyenya vakanganyisi, aniko ni randa mlayo wako.

¹¹⁴Awe ngawe wuthavelo wangu ni txitxhavangu txangu, ani ni themba dipswi dako.

¹¹⁵Tsulani kule anu vabihi, kasi ni na xayisa sirumo sa Txizimu txangu!

¹¹⁶Ni tsanise, nga ti u nga ni thembisa, se ni na hanya; u nga ni leke ni txi wa tinganani, nguko ani ni themba awe.

¹¹⁷Ni vhune, se ni na huluka ni na xonipha milayo yako yotshe mbimo.

¹¹⁸Awe wa va nyenya votshe vale va hambanako ni milayo yako, nguko mipimiso yawe nja wukanganyisi.

¹¹⁹Votshe vabihi va ha mafuni u va wona kota mabivi, ngu toneto ani ni randa sileleto sako.

¹²⁰Mmidi wangu wa dhudhumela ngu dizowa masoni kwako, ngu txithavo txi ni ku natxo ka mithetho yako!

¹²¹Ni xayisile mlayo ni kululama, u nga ni ningele manzani ka valala vangu.

¹²²Thembisa ti to u na ni vhuna ani txithumi txako; u nga leke vathu vo ti kulisa va txi ni xanisa.

¹²³Maso angu ma dokovela ngu kurinzela kuhanyisa kwako, na ni txi verela kuhanyiswa, nga ti u nga thembisa tona.

¹²⁴Ni xayise ani txithumi txako, madingano ni lirando lako; ni gondise milayo yako!

¹²⁵Ani ni txithumi txako. Ni he mapimo, nguko ni lava ku engisisa sileleto sako.

¹²⁶MKOMA, njikhati txako txa kuthuma; vona va nyenyile mlayo wako.

¹²⁷Ngu toneto, na randa ngutu milayo yako, kupinda nzalama ya yinene ngutu.

¹²⁸Ngu toneto, na dhunda sileleto sako na nyenya totshe tinzila ta makuhu.

¹²⁹Sileleto sako sa xamalisa; ngu toneto na si xayisa ngu yotshe mbilu yangu.

¹³⁰Txhamuselo ya mapswi ako ya tula maso, ya ninga mapimo ka sisiwana.

¹³¹Na tula txisofu txangu ni txi hefemuteka nguko ni navela sirumo sako.

¹³²Ni wone, u txi telwa ngu wumbilu ngu ngani, nga tile u ti mahako ka vale va kurandako.

¹³³Tsanisa mikondo yangu nzilani ka dipswi dako, u nga tumele ti to wubihi wu txi ni fuma.

¹³⁴Ni hulukise mu ka kuxuphwa ngu vathu, kasiku ni na xayisa sileleto sako.

¹³⁵Khohe yako yi na ni woninge ani txithumi txako; ni gondise milayo yako.

¹³⁶Mirongo yangu ya khulunga nga mnambo, nguko mlayo wako kha wu xoniphwi.

¹³⁷MKOMA, awe u lulamile mithetho yako ni yona yi lulamile.

¹³⁸U hi ningile sileleto sako ngu kululama, ni kuthembeka ka hombe.

¹³⁹Txiviti txangu txa ni hisa nga mndilo, nguko valala vangu kha va khatali ngu mapswi ako.

¹⁴⁰Sithembiso sako si tsani ngutu; ngu toneto ani txithumi txako na si randa.

¹⁴¹Ni m'dotho, kambe va ni kanyisa, aniko kha ni divali milayo yako.

¹⁴²Kululama kwako kha ku na magwito ni mlayo wako, mbwa ditshuri yotshe mbimo.

¹⁴³Ni taletwe ngu kupandiseka ni sikarato; aniko milayo yako ya ni ninga kutsaka.

¹⁴⁴Sileleto sako nzo lulama yotshe mbimo; ni he mapimo ni na hanya.

¹⁴⁵MKOMA, ni khongete ngu yotshe mbilu; ni xamule, nguko ni lava kuxayisa milayo yako.

¹⁴⁶Na kukombela, ni hanyise, kasiku ni na xayisa sileleto sako.

¹⁴⁷Wu sinzi kuhuma wuronga, na vindukela ni txi kudhana, ni themba mapswi ako.

¹⁴⁸Na pileka wotshe wusiku ni si oteli, kasiku ni alakanyela milayo yako.

¹⁴⁹Engisa, MKOMA, dipswi dangu, ngu wumbilu wako; ni hanyise, madingano ni txithembiso txako.

¹⁵⁰Va tshuketela hafuhi avale va ni xanisako ngu makungo a kubiha, ve hambana ni mlayo wako.

¹⁵¹Aniko awe, MKOMA, u hafuhi; sotshe sirumo sako nza ditshuri.

¹⁵²Kukhukhela ha wananani kwangu, na si ziva sileleto sako; awe u si tsanisile kala kupinduka.

¹⁵³Wona kuxaniseka kwangu, u ni txhatxhisa, ina nguko kha na divala mlayo wako.

¹⁵⁴Vhikela mhaka yangu, u txi ni hanyisa; ni hanyise kota kuthembisa kwako!

¹⁵⁵Kuhanyiswa ku kule ka vabihi, nguko kha va lavi sileleto sako.

¹⁵⁶Wunene wako mbwa hombe, MKOMA; ni hanyise, madingano ni sithembiso sako.

¹⁵⁷Mba vangi valala vangu ni vaxanisi vangu; aniko ani kha ni hambani ni milayo yako.

¹⁵⁸Ngako ni txi wona sindaka-milayo, na pandiseka, nguko kha si xayisi mithetho yako.

¹⁵⁹MKOMA, wona ti ni dhundisako tona mithetho yako; ni hanyise, madingano ni lirando lako.

¹⁶⁰Mapswi ako ma tsaniswa ngu ditshuri; mithetho yotshe ya kululama kwako, ya simama kala kupinduka.

¹⁶¹Vathu va mtamo va ni xanisa ni si nga ni mnandu, aniko mbilu yangu yi thava mapswi ako.

¹⁶²Na tsaka ngu sithembiso sako, ku nga wule a manako thomba yayingi.

¹⁶³Na nyenya makuhu, kha ni ma lavi, aniko ni randa mlayo wako.

¹⁶⁴Na kudhumisa mtxhanu wa sikhati ni simbidi ngu ditshiku, ngu mhaka ya mithetho ya kululama kwako.

¹⁶⁵Avale va randako mlayo wako va hanya ngu kudikha ka hombe, kuwalo txilo txi va khuvekisako.

¹⁶⁶MKOMA, ani ni rinzela kuhanyisa kwako, nguko ni xayisile sirumo sako.

¹⁶⁷Na xayisa sileleto sako na si dhunda ngu yotshe mbilu.

¹⁶⁸Na vekisa sirumo sako ni sileleto sako; awe wa tiziva totshe tinzila tangu!

¹⁶⁹Huwa yangu yi na hoke kwako, MKOMA; Ni he mapimo, madingano ni kuwomba kwako;

¹⁷⁰Txikhongelo txangu txi na hoke masoni ka khohe yako; ni txhatxhise, madingano ni kuwomba kwako!

¹⁷¹Ni na embelela ndando ya ku kudhumisa, nguko awe u ni gondisile kuziva milayo yako.

¹⁷²Ni na embelela mahungu ako, nguko milayo yako yi lulamile.

¹⁷³Dianza dako di na ni vhune, nguko ani ni tshatile kulondisa sileleto sako.

¹⁷⁴MKOMA, ani ni vilela kuhanyiswa ngu ngawe, nguko mlayo wako wu tsakisa mbilu yangu.

¹⁷⁵Nihe wutomi, kasiku ni sikota ku kudhumisa, mithetho yako yi na ni vhune.

¹⁷⁶Ni pepesekile kufana ni nvuta yo mwalala; tsimbita txithumi txiya txako, nguko ani kha na divala sirumo sako.