Read chopi Masalmo 132 Bible Online

Masalmo 132 - chopi bible

Masalmo 132

¹Ndando ya vapfhumba MKOMA, alakanya Dhavhidha ni sotshe sikarato sakwe!

²Alakanya sixambanyo sakwe, sithembiso si a nga si maha ka Txizimu txa mtamo, txa Jakobe, a txi khene:

³“Kha ni na mbi wulela nyumbani kwangu, kambe kha ni na mbi otela ha ditahoni kwangu;

⁴kha ni na mbi ninga wukohe maso angu, hambi kupfhumisa timboni tangu,

⁵kala kuza ni txi lavela MKOMA wukhalo, nyumba yo zumbela ka wona Txizimu txa mtamo txa Jakobe.”

⁶Hi engisile ti to mtundu wa txitumelelano wu maneka Efrata, aniko hi ti ya wu mana thembweni ka Jahari.

⁷A hi wuleleni nyumbani ko sawuleka ka MKOMA! A hi khizameni masoni ka txikhalo txakwe txa wukoma!

⁸Wuka MKOMA, nyumbani kwako ko humula, awe ni mtundu wa mtamo wako.

⁹Vaphaxeli vako va na ambale wululamo, kambe vasawuleki vako va na tsake!

¹⁰Ngu lirando ka Dhavhidha, txithumi txako, u nga tshuralelise khohe ya mtotiwa wako MKOMA.

¹¹ Awe u mahile txithembiso ka Dhavhidha, txithembiso txi u no mbi txi tshuralela, u ti khawe: “Mmweyo wa vanana vako ni na mmaha mfumeli awu a no fuma msana kwako.

¹²Ngako vanana vako va txi xayisa txitumelelano txangu ni sileleto sangu si ni no va gondisa, vanana vawe ni vona, va na khalahatsha ha txikhaloni kwako ka wukoma, kala kupinduka.”

¹³Ngu toneto, MKOMA a sawute mmango wa Siyoni, na a txi xuva ku wu maha nyumba yakwe, a txi khene:

¹⁴“A hawa i m'tini kwangu kala kupinduka; ni na zumba kona nguko na kutsakela.

¹⁵M'ti wuwa ni na wu katekisa wu pfuna sakudya; ni na dyisa sisiwana sa wona si khura.

¹⁶Ni na ninga vaphaxeli va wona mtamo wa kulamulela vamwani se vasawuleki va kona va na tsaka ngutu.

¹⁷Konaho ni na wusa mtamo wa mfumo wa Dhavhidha, konako ni na humelelisa liwoningo la mfumeli wu ni nga msawula.

¹⁸Ni na thela pfilu-pfilu ka valala vakwe; aniko kwakwe m'bhoti wakwe wu na kuphatima.”