Read chopi Masalmo 135 Bible Online

Masalmo 135 - chopi bible

Masalmo 135

¹Dhumisani MKOMA! Dhumisani ditina da MKOMA; di dhumiseni, anu sithumi sa MKOMA,

²anu mi ku Nyumbani ka MKOMA, magumani ka Nyumba ya Txizimu txathu.

³Dhumisani MKOMA, nguko ene i MKOMA wamnene; embelelani mi dhumisa ditina dakwe nguko da tsakisa.

⁴MKOMA a ti sawulete Jakobe ni va ka Israyeli kasiku ve maha thomba yakwe.

⁵Nguko ani na tiziva ti to MKOMA mbwa hombe, ni ti to Txizimu txathu txi txitimwi ka sotshe sizimu.

⁶Totshe ti MKOMA a ti lavako ene wa ti maha, ha mafuni ni nzumani, lineneni ni ka otshe makhalo a kueta.

⁷Ene wa wuyisa marefu a diphuho ngu magemeta-mitshi ka mafu; wa humisa singwalangwanda, wa wisa mati a nzuma wa tulela maphuho me huma ngu ku khotelwani ka ona.

⁸Ngene a nga dayela matiwula a Vaegipta kukhukhela ka matiwula a vathu, kala ka matiwula a sihari;

⁹a rumete sixamaliso ni sidiwukiso, hagari kwako awe Egipta kasi kutsayisa Faro ni sithumi sakwe.

¹⁰Ene a khozisile mifumo yo tala a date vafumeli va mtamo:

¹¹Seyoni, mfumeli wa Vaamori, ni Oge, mfumeli wa Bhasani, ni votshe vafumeli Vakanana.

¹²Ni matiko a vona vafumelivo, a ma ningete me maha thomba, thomba ya kulumba Vaisrayeli, i ku ngamu yakwe.

¹³MKOMA, ditina dako di na pfaliswa kala kupinduka! MKOMA, vathu va na kualakanya ka liveleko ni liveleko!

¹⁴MKOMA a na lamula vathu vakwe e pfela wusiwana sithumi sakwe.

¹⁵Sizimu sa vamatiko nza kuwumbwa ngu nzalama ni silivhela, nzimaha sa kukhandwa ngu manza a vathu.

¹⁶Sina ni sisofu, aniko kha si wombawombi; sina ni maso, aniko kha si woni;

¹⁷sina ni tinzeve, aniko kha si engisi; kuwalo muhefemulo mkanani ka sona!

¹⁸Va na fanane ni sithombe soneso ava va si wumbako ni va va kholwako ka sona.

¹⁹Anu Nyumba ya ka Israyeli, bongani MKOMA! Anu Nyumba ya ka Aroni, bongani MKOMA!

²⁰Anu Nyumba ya ka Levhi, bongani MKOMA! Anu mi thavako MKOMA bongani MKOMA!

²¹A na bongwe MKOMA kukhukhela Siyoni, awu a zumbako Jerusalema! Dhumisani MKOMA.