Read chopi Masalmo 140 Bible Online

Masalmo 140 - chopi bible

Masalmo 140

¹Disalmo da Dhavhidha. Ka mthangeli wa vaembeleli MKOMA, ni hulukise ka vathu vo biha; ni vhikele ka vathu va tshofu;

²vo alakanyela kubiha timbiluni kwawe; va tshanganelako kuwusa mazunga.

³Va lotile tidimi nga minyoka; wuxungu wo nga wa timamba wu hahatshi ka sisofu sawe.

⁴Ni vhikele, awe MKOMA, manzani ka va va wubihi; ni vhikele ka vathu va tshofu, va mahako sikungo kasi ku ni wisa hahatshi.

⁵Vathu va kutiguleta va ni riyete ngu milawu; va ni riyete ngu likoka hanzila; va ni riyete milawu yo tala, va lava ku ni bzweta.

⁶Ani ni ti khani ka MKOMA: “Awe ngawe Txizimu txangu!” Engisa huwa ya kudila kwangu, awe MKOMA!

⁷Awe MKOMA Txizimu, u m'vhikeli wa kuhanyiswa kwangu, awe u tsivete msungo wangu ka ditshiku da kulwa.

⁸MKOMA, vathu vo biha u nga va ninge asi va si lavako; u nga tumele ti to makungo awe o biha meya masoni.

⁹Se va txi guleta misungo vale va ni randelako yi na welwe ngu wubihi wule va wu wombako ngu sisofu sawe.

¹⁰Makala a mndilo ma nawe txitimwi kwawe, va na rinzwe mndiloni, ka maphalani o tshima, kasi ku va siswi ve wuka kambe.

¹¹Vathu va makuhu va na fuve ha mafuni; makhombo ma na londisele sigevenga kala kuza me si fuvisa.

¹²Na tiziva ti to MKOMA, na emela mhaka ya wule wo tsindavetwa kumweko ni madingano a txikulungu.

¹³Ngu toneto, vathu va kululama va na dhumisa ditina dako; vathu va ditshuri va na zumba masoni kwako.