Read chopi Masalmo 144 Bible Online

Masalmo 144 - chopi bible

Masalmo 144

¹Disalmo da Dhavhidha A na dhumiswe MKOMA i ku dirigwi dangu! Awu a gondisako manza kulwa, ni titiho tangu kuya yimbini.

²Ene i Mthaveleli wangu, mkhokhola wangu, wuthavelo wangu; ngena mtiruli wangu ni m'vhikeli wangu, awu ni thembako kwakwe; ngene a ni ningako mtamo wa kufuma vathu.

³ MKOMA, nji txani m'thu, koza u txi mualakanya kani? Njitxani mwanana wa m'thu, kasiku u txi mkhatalela kani?

⁴M'thu a fana ni wukanganyisi; masiku akwe ma fana ni mtsudi wu wu pindako.

⁵MKOMA, releta nzuma yako u txhika; gwesa mimango, kasi ku yi na tuvika.

⁶Dhindisa tinyangafula tako u txi va tshatulela; khwinza tingove tako u txi va hangalasa ve thava.

⁷U di kona txitimwiyo, nawuluta manza ako, ni thavise u ni hulukisa ka mati awa amangi, ni manzani ka vanana va vamatiko,

⁸avava sisofu sawe si wombawombako wukanganyisi, ni manza awe a txinene ma xambanyako makuhu.

⁹Kwako awe Txizimu, ni embelela ndando ya yiphya; ngu haripa ni txiya txa digumi da tingoti, kwako ni na embelela ni kudhumisa.

¹⁰Awe u ningako vafumeli mtamo wa kuxula, u ponisako txithumi txako Dhavhidha, ka ditxhari di dayako

¹¹Ni txhatxhise u ni thavisa ka manza a vanana va vamatiko, avale sisofu sawe si wombawombako wukanganganyisi avale manza awe a txinene i ku a wubihi.

¹²Kasi ku vanana va vathu, va na fana ni mindonga, yi yi kulako yi anda i di ngadi yiphya; vanana vathu vamahorana va na fana ni marigwi a makhonani o vatelwa nga tinyumba ta nyumba ya wukoma,

¹³kasi ku sizenda sathu si tala ngu sotshe so elulwa; kasi ku mitxhambi yathu yi na velekela ngu magumi a mazana, ni magumi a magumi a mazana, amu ka mabhudhula kwathu.

¹⁴Tihomu tathu ti na have kwati, ti txi ena. Mikhokhola yathu kha ya dolwa, kha ku nga ni kuyiswa kupayulwani, kha ku nga ni kudila maphangoni kwathu.

¹⁵Va katekile vathu va ti mahekako tiya kwawe! Va katekile vathu vava, Txizimu i ku MKOMA wawe!