Read chopi Masalmo 145 Bible Online

Masalmo 145 - chopi bible

Masalmo 145

¹Mkoma Txizimu. Ndando ya Dhavhidha. Ni na kuguleta awe Txizimu, MKOMA wangu, ni na bonga ditina dako kupinduka ni kupinduka.

²Otshe masiku ni na ku bonga. Ni na dhumisa ditina dako kupinduka ni kupinduka.

³MKOMA mbwa hombe, kambe ana ni fanelo yo dhumiswa ngutu, wuhombe wakwe kha wu sikoti kupimwa.

⁴Liveleko li na xawutela mithumo yako ka limwani liveleko, se votshe va na huwelela mithumo yako ya mtamo.

⁵Ni na xawutela wuhombe wa wudhumo wa wulamuli wako, ni wuhombe wa mithumo yako.

⁶Va na xawutela mithumo yako ya mtamo ni kuthisa, va txi huwelela wuhombe wako.

⁷Vathu va na nuwela ngutu wudhumo wa wunene wako wa hombe kambe va na embelela wululamo kwako.

⁸MKOMA a ni wunene ni wumbilu; wa timisela kambe a ni kutsetsa.

⁹MKOMA mbwamnene ka votshe; ni wumbilu wakwe wu dingana yotshe mithumo yakwe.

¹⁰Awe MKOMA, yotshe mithumo yako yi na kudhumisa ni votshe vasawuleki vako va na ku bonga!

¹¹Va na womba-womba ngu wudhumo wa mfumo wako kambe va na xawutela mtamo wako,

¹²kasi kuzivisa vanana va vathu mithumo yako ya hombe ni kuphatima ka wudhumo wa mfumo wako!

¹³Mfumo wako mfumo wa kala kupinduka; kufuma kwako kuhoka ka totshe tiveleko.

¹⁴MKOMA wa wusa votshe vale va wako, a txi tsanisa votshe vale va khuvekako.

¹⁵Maso a votshe ma wonetela awe, kambe awe wa va ninga sakudya ngu mbimo ya kona.

¹⁶Awe wa tula manza, u ninga si si lavekako ka votshe va va hanyako.

¹⁷MKOMA a lulamile ka totshe tinzila takwe, ni kusawuleka ka yotshe mithumo yakwe.

¹⁸MKOMA a hafuhi ka votshe vale va m'dhanako; ka votshe vale va m'dhanako ngu ditshuri.

¹⁹Ene a na maha kunavela ka vale va m'thavako; a na engisa kudila kwawe, kambe a va hanyisa.

²⁰MKOMA wa va xayisa votshe vale va mrandako; aniko va na fuviswa votshe vaonhi.

²¹Txisofu txangu txi na embelela wudhumo wa MKOMA! Ni votshe vathu va na dhumisa ditina dakwe do sawuleka kala kupinduka!