Read chopi Masalmo 147 Bible Online

Masalmo 147 - chopi bible

Masalmo 147

¹Dhumisani MKOMA! Nguko ndinene kuembelela hi dhumisa Txizimu txathu; Atiya ta tsakisa, kudhumisa Txizimu ngu fanelo.

²MKOMA wa wuseta Jerusalema e tshanganisa ngamu ya Israyeli, yi nga ti hangalakile.

³Ene wa tangalisa timbilu ta vale va nga khuveka a txi bhanditxha silonda sawe!

⁴Ene wa bala mtengo wa tinyeleti e raya ditina ka yimwani ni yimwani.

⁵Mbwa hombe MKOMA wathu, kambe mbwa mtamo wa hombe; wuzivi wakwe kha wu na magwito.

⁶MKOMA wa xayisa sisiwana, aniko wa wisa hahatshi avale va mahako kubiha.

⁷Embelelani ka MKOMA, mi ninga kubonga; embelelani kudhumisa ka Txizimu txathu ngu haripa.

⁸Ngene a fenengetako nzuma ngu marefu, a lulamisa mati kasiku mewa ha mafuni kambe wa milisa mwasi txitimwi ka mimango;

⁹a ningako ka sihari sakudya sa sona ni ka mavhondo a magwana, mbimo yi ma dilako.

¹⁰Kha tsakiswi ngu mtamo wa dihantxhi hambi kutsaka ngu txikuluveta txa wamwamna.

¹¹MKOMA a dhunda avale va m'thavako, avale va thembako lirando lakwe.

¹²Jerusalema, dhumisa MKOMA, Siyoni, dhumisa Txizimu txako.

¹³Ene wa tsanisa sikhoto sa matimba ako e katekisa vanana vako va ku mndani kwako.

¹⁴Wa tsanisa kudikha mndani ka mihingano ya ditiko dako a txi kukhurisa ngu fulaho ya yinene.

¹⁵Wa rumela mithetho yakwe ha mafuni dipswi dakwe da kuluveta kuhangalaka;

¹⁶wa wisa hunguva yo basa nga matoya a tinvuta, e hangalasa maralala nga dikhuma;

¹⁷wa wisa maralala o nga sirigwana kuwalo m'thu wu a tsanelako pheho ya kona.

¹⁸Ngu msana wa rumela dimwani dipswi, se maralala me nyivilika; wa ruma diphuho, di txi futeta, se mati ma txi khulunga.

¹⁹Ene wa rumela mahungu akwe ka va ka Jakobe, mithetho yakwe ni milayo yakwe ka va ka Israyeli.

²⁰Ene kha ti maha tiya ka mamwani matiko, kha ma tulela kuziva mithetho yakwe. Dhumisani MKOMA!