Read chopi Masalmo 16 Bible Online

Masalmo 16 - chopi bible

Masalmo 16

¹Ndando ya Dhavhidha Ni vekete, awe Txizimu, nguko ni thavela kwako.

²Ni wombile ka MKOMA ni txi khani: Awe ngawe MKOMA wangu, hahanze kwako kuwalo tximwani txi ni tsakisako.

³Vasawuleki va va ku ha mafuni, ava va xamalisako ngu mtamo wawe, ngu vona va ni tsakisako.

⁴Kupanda ku na engetelana ka vale va ningelako miningelo ka simwani sizimu; Ani kha ni na mbi patana navo ka timhamba tawe ta mnoha, hambi kukhumbuka matina awe ngu txisofu txangu.

⁵MKOMA, awe u txyavelo txangu, digombe di di ni lumbako; wutomi wangu wu manzani kwako.

⁶Ni ningilwe txyavelo ka makhalo o tsakisa kunene thomba yangu ya ni tsakisa.

⁷A na dhumiswe MKOMA, a ni layako; hambi ni wusiku wa khumbukisa livhalo langu.

⁸Yotshe mbimo ni na ni MKOMA masoni kwangu; kha ni na mbi dhukiswa ngu txilo, nguko ene a ka didhawa dangu da txinene.

⁹Ngu kumaha keto, mbilu yangu ya tsaka, ni moya wangu wa nengela ni mmidi wangu wu na humula ngu kudikha.

¹⁰ Awe MKOMA, khu na mbi ni leka ka wukhalo wa vafi, kambe khu na mbi tumela ti to msawuleki wako e sina diphalani.

¹¹U na ni komba nzila ya wutomi; masoni kwako ku tate litsako; ka dianza dako da txinene, ku ni kuzumbiseka ko mbi gwita.