Read chopi Masalmo 17 Bible Online

Masalmo 17 - chopi bible

Masalmo 17

¹Mkombelo wa Dhavhidha Engisa, MKOMA, kululama ka mhaka yangu, engisa huwa yangu! Engisa mkombelo wangu, wu huma txisofuni kwangu ko mbi xengetela.

²Kulamulwa kwangu ku na hume ngu kwako, maso ako ma na wone ditshuri da mhaka.

³U xote mbilu yangu; u ni endete ni wusiku; u ni xolisisile, aniko khwa mana to biha; ni to pimisa ku khani, txisofu txangu kha txi na mbi tsulupeta.

⁴Kha na maha kubiha nga ti vathu va mahako; ani ni ti vhikete ka tinzila ta vathu va tshofu, ngu kuxonipha sileleto sako.

⁵Ninga mikondo yangu kulondisa tinzila tako, kasiku ni si hambuki ka tona.

⁶Ni huwelela kwako, Txizimu, nguko awe u na ni xamula; riya nzeve yako kwangu, u txi engisa mapswi angu.

⁷Komba kuxamalisa ka lirando lako, awe u hulukisako vale va thavelako mtamoni kwako.

⁸Ni xayise kufana ni ndololo ya diso dako; ni sise mtsudini ka mabhapi ako,

⁹kule ka vale vo biha, va ni mahelako wurena, u txi ni sisa ka valala vangu va ni randelako.

¹⁰Va bangisile mbilu yawe ngu mafura va womba-womba ngu kutikulisa.

¹¹Va ni londisela ngu mkondo, va txi ni randela, va lava ku ni wisa hahatshi.

¹²Va fana ni tingonyamo ti ti lavako kupfinya mpfimba wa tona ni singonyamwana si di sisate diphalani ka sona.

¹³Khukha u txi ema, MKOMA! Va hinge u txi va dikha hahatshi! Ni hulukise ngu ditxhari dako, ka vathu va kubiha;

¹⁴ni hulukise, MKOMA, ngu diwoko dako ka va vo biha, va fuvise ka ditiko diya. Ka vale va kuthembako va ninge tithomba to tala, ti dinganako kukhurisa vanana vawe ve tshumela ve khurisa ni vatukulu vawe.

¹⁵Se ani, kulamulani kwangu, ni na wona khohe yako; ngako ni txi wuka ni na tsaka ngu txithuzi txako.