Read chopi Masalmo 18 Bible Online

Masalmo 18 - chopi bible

Masalmo 18

¹Dhavhidha. Ka mthangeli wa vaembeleli. Mapswi a ndando ya Dhavhidha, txithumi txa Txizimu, a embelete ka MKOMA Txizimu, ka ditshiku di a nga m'hulukisa ka Sawule, ni ka votshe valala vakwe. Ni na kuranda ngu mbilu yangu, MKOMA, Awe u mtamo wangu.

²MKOMA, dirigwi dangu, ni mkhokhola wangu wo tsana, kambe mtxhatxhisi wangu; Txizimu txangu mkhokhola wangu, buthavelo wu ni thembako wona; njitxhavangu txangu, mtamo wa kuhanyiswa kwangu, wuthavelo wangu wa hombe.

³Ni na khumbuka ditina da MKOMA, di dinganako kudhumiswa, se ni na txhatxhiswa ka valala vangu.

⁴Ni randetwe ngu titxhini ta lifo, ni minambo ya wubihi yi ni fenengetile.

⁵Mtamo wa lifo wu ni bzwetile lifo li ni riyete ngu milawu ya lona.

⁶Kupandisekani kwangu ni dhani MKOMA, ni kombete txivhuno ka Txizimu txangu. Txi di Nyumbani ka txona txi engisile dipswi dangu, huwa yangu yi hokile tinzeveni ka txona.

⁷Sekoko mafu ma to zinginika, ma txi dekadeka, makhato a mimango ma to dhudhumela: Ma dhudhumete ngu kuhenya ka Txizimu.

⁸Wu humile wutshi ngu tithonvuni ka txona ku txi huma mndilo wa luhya ngu txisofuni ka txona; kuhuma kambe ni makala a mndilo wo tura.

⁹Txizimu txi to tula nzuma txi txhika ku di ni txidema hahatshi ka mikondo ya txona.

¹⁰Txi puruma txi di gadhile dikerubhima, txi tsimbila txi di mabhapini ka diphuho.

¹¹Txizimu txi to sisala mndani ka txidema txi ti bhiyela ngu marefu a hombe o tala ngu mati.

¹²Masoni ka txona ku to huma kuphatima, ka marefu a mtima ku to huma maralala ni makala a mndilo.

¹³MKOMA a to dhinda a di nzumani, Nyatxitimwi a huwelete ngu dipswi dakwe.

¹⁴A to khwinza tingove takwe ta miseve a txi hangalasa valala, a to dhindisa singwalangwanda, a txi va tutumisa.

¹⁵Ku to woneka hahatshi ka linene makhato a mafu ma txi vhunungulwa, mbimo yi di nga pfala dipswi dako do thisa, MKOMA, ni m'hefemulo wa tithonvu tako.

¹⁶MKOMA a di txitimwi a nawulutile diwoko dakwe e ni ñola, a txi ni humisa ka mati o mita.

¹⁷A ni hulukisile ka mlala wangu wa mtamo, ni ka vale va nga ti ti ni vengela, va ku ni mtamo kupinda ani.

¹⁸Va ni kanganyisile ni di kupandisekani, aniko MKOMA a ni lwete.

¹⁹A ni yisile ka wukhalo wo mbi na phango, a ni hulukisile nguko ene wa ni randa.

²⁰MKOMA a ni xayisile madingano ni kululama kwangu, ene wa ni txhatxhazela madingano ni kululama ka mahanyelo angu,

²¹nguko ani ni londetile tinzila ta MKOMA kha ni zivi kutshuralela Txizimu txangu.

²²Mithetho yakwe yotshe yi masoni kwangu kambe kha ni zivi kukaneta sirumo sakwe.

²³Ni m'thu wa ditshuri masoni kwakwe kambe na ti vhikela ka tinzila to biha.

²⁴MKOMA a ni txhatxhazete, madingano ni wunene wangu madingano ni mahanyelo angu o lulama masoni kwakwe.

²⁵Awe MKOMA, u thembekile ka wule i ku wo thembeka kwako, u wa ditshuri ka wule i ku wa ditshuri.

²⁶Awe u lulamile ka wule a nga lulama u txharihile ka wule a ku ni mapimo o biha.

²⁷Awe wa hulukisa avale va ti vekako hahatshi kambe wa wisa hahatshi avale va ti guletako.

²⁸MKOMA, awe u liwoningo langu, awe, Txizimu txangu ngawe u woningako mtema wangu.

²⁹Kumweko ni nawe na sikota kulwa ni valala; ngu mhaka ya mtamo wako ni na ndaka tibhiyo.

³⁰Nzila ya Txizimu njo hetiseka; dipswi da MKOMA ndo tsana; Njitxhavangu ka votshe vale va di thembako.

³¹I mani i ku Txizimu, hahanze kwakwe MKOMA kani? I mani i ku dirigwi, hahanze ka Txizimu txathu kani?

³²Txizimu ngu txona txi ni mahako wa mtamo ngu txona txi mahako nzila yangu yi va yo hetiseka.

³³ Txi maha mikondo yangu yi txi nga ya mhoti ni ku ni veka txitimwi ka mimango.

³⁴Txa gondisa manza angu kulwa kambe txa gondisa manza angu kudomba wulaho wa koporo.

³⁵MKOMA, awe wa ni ninga txitxhavangu txako txa ku ni vhikela, wa ni setela ngu dianza dako da txinene ni wunene wako wu ni ningile kuzumbiseka.

³⁶U lulamisile nzila yangu ni mikondo yangu kha ya thidhela.

³⁷Ni hingile valala vangu ni za ni txi va mana; kha na humula kala kuza ni va fuvisa.

³⁸Ni va wilete; aniko kha va wuka. Va wite hahatshi ka mikondo yangu.

³⁹Awe u ni ningile mtamo wa kulwa; u khozisile valala vangu masoni kwangu.

⁴⁰Awe wa ni ninga mtamo wa kuxula valala vangu; ni na va fuvisa avale va ni vengelako.

⁴¹Vona va peka huwa, aniko ni wammweyo kha va lamuleli; va dhana MKOMA, aniko ene kha va xamuli.

⁴²Ni na va kuya ve fana ni lithulu li huhiswako ngu diphuho, nava kandetela nga madhaka a hanzila.

⁴³U ni hulukisile ka vhilinganya ya ditiko u txi ni veka ni maha mthangeli wa mifumo; vathu vale ni si va ziviko va na ni thumela.

⁴⁴Ngu kupfa dipswi dangu, va na ni engisa; Vamatiko va na khoza kwangu.

⁴⁵Vona va thidhela kambe va huma va txi dhudhumela ngu mikhokholani kwawe.

⁴⁶Hanya MKOMA! A na dhumiswe mlweli wangu! Txi na kuliswe Txizimu, Muhanyisi wangu!

⁴⁷Txizimu ngu txona txi ni ningako mtamo wa kuxula, ngu txona txi ni khoziselako matiko, txi ma veka mtamoni kwangu

⁴⁸txa ni hulukisa ka valala vangu. Awe, MKOMA, wa ni guleta txitimwi ka valala vangu u txi ni hulukisa ka vale va ku ni tshofu.

⁴⁹ Ngu kumaha keto, MKOMA, ni na kudhumisa hagari ka mifumo kambe ni na embelela tindando ta ku kudhumisa.

⁵⁰Txizimu txa ninga kuxula ka hombe ka mfumeli wa txona kambe txa komba lirando la hombe ka wule txi nga msawula, i ku Dhavhidha, ni lotshe liveleko lakwe kala kupinduka.