Read chopi Masalmo 19 Bible Online

Masalmo 19 - chopi bible

Masalmo 19

¹Disalmo da Dhavhidha. Ka mthangeli wa vaembeleli. Nzuma yi nuwela wudhumo wa Txizimu, ani mpfhuka wu zivisa mithumo ya manza a txona.

²Ditshiku di womba-womba ngu wudhumo wa txona ka dimwani ditshiku, ani wusiku wu xawutela tona eto ka wumwani wusiku.

³Kha si wombi mahungu mwendo mapswi, kha ku pfali kutuma ka sona.

⁴ Aniko kunuwela ka sona ka hoka ka dotshe ditiko ni kuwombawomba ka sona kuhokile magemeta-mitshi ka mafu. Txizimu txi akete ditambo m'dhuti nzumani,

⁵ditambo di humako ni mixo kufana ni mteki a wukako ngu ha m'bhedhuni kwakwe, kufana ni ndena yo tsakela kumaha mapalisana a kututuma.

⁶Dona di huma di txi khukhela makhatoni ka nzuma di tutuma di txi ya manela magwito ka yona nzuma. Kha ku nga ho txilo txi sikotako kuthava kuhisa ka dona.

⁷Mlayo wa MKOMA mbwo hetiseka, wa ninga kuhanya kakuphya. Sirumo sa MKOMA nzo thembeka; sa ninga wuzivi ka m'thu wo divala.

⁸Sirumo sa MKOMA nzo lulama; sa ninga litsako mbiluni. Sirumo sa MKOMA nzo lulama; sa woninga mapimo.

⁹Kuthava MKOMA ngunene; ka simama yotshe mbimo. Kulamula ka MKOMA nga ditshuri kambe ku lulamile yotshe mbimo.

¹⁰Milayo ya dhundeka ngutu kupinda nzalama ya ditshuri; ya lombela kupinda wulombe wa mahesa;

¹¹ya gondisa wuzivi ka txithumi txako, MKOMA, awule a yi xayisako wa mana hakhelo.

¹²I mani waku a nga wona sionho sakwe apune kani? Ni divalele, MKOMA, sionho si ni si si woniko!

¹³Kambe hulukisa txithumi txako amu ko tikulisa; kasi ku ku si fumi kwangu; ngu kumaha keto, ni na va ni di thembekile, ni si nga ni txisolo ni txi ti hulukisa ka sionho sa hombe.

¹⁴Mapswi a txisofu txangu, ni mipimiso ya mbilu yangu ma na amukeleke masoni kwako MKOMA, awe dirigwi dangu ni mtxhatxhisi wangu.