Read chopi Masalmo 21 Bible Online

Masalmo 21 - chopi bible

Masalmo 21

¹Disalmo da Dhavhidha. Ka mthangeli wa vaembeleli. Mfumeli wa tsaka mtamoni kwako, MKOMA, wa tsaka ngutu, nguko u mningile kuxula valala.

²U mningile asi a nga ti si navela ngu mbilu yakwe khwa mtona asi a nga kukombela.

³U mu hingetile u txi mninga makatekwa u mu ambekile ha msungo kwakwe m'bhoti wa nzalama ya yinene.

⁴Ene a kombete wutomi, se awe u mningile, wutomi wo lapha, wo fungala, wo mbi na magwito.

⁵Wudhumo wakwe mbwa hombe, ngu mhaka ya kuhanyisa kwako; awe u mningile nduma ni kuxonipheka.

⁶U mningile makatekwa o mbi na magwito; u mninga kuhanya masoni kwako a di tate ngu litsako.

⁷Nguko m'fumeli a themba MKOMA ngu wunene wa Nyatxitimwi kha na mbi khuvekiswa ngu txilo.

⁸Dianza da MKOMA di na ñola votshe valala vako; dianza dako da txinene di na tsayisa votshe va va ku vengelako.

⁹U na va turisa kufana ni m'dhikila wa mndilo, aha u no ti wonekisa, Ngu kuhenya kwako, u na va fuvisa, mndilo wa txivavula wu na va heta.

¹⁰U na fuvisa mihando yawe ha mafuni, kuwalo ni wammweyo a no sala a txi hanya.

¹¹Valala va langanile kumaha kubiha ni ku kuwukela, va ni txikungo, aniko kha va na mbi sikota kumaha txilo.

¹²Nguko u na va fula tikhohe ngu tingove; va na kutshuralela ve tutuma.

¹³Komba mtamo wako, MKOMA, hi na embelela, hi txi dhumisa mtamo wako.