Read chopi Masalmo 25 Bible Online

Masalmo 25 - chopi bible

Masalmo 25

¹Disalmo da Dhavhidha MKOMA ni guleta mipimiso yangu ni txi yi tisa kwako.

²Txizimu txangu, ni themba awe, u nga ni leke ni txi wiswa tingana. Hambi valala vangu va nga thuke va txi ni seka!

³Ngu ditshuri, avale va themako awe, kha va na mbi wiswa tingana. Va na wiswa tingana avale va ku wukelako na ku si nga ni txigelo.

⁴MKOMA, ni gondise tinzila tako, ni gondise kutsimbila ngu magondo ako.

⁵Ni gondise kutsimbila ngu tinzila tako ta ditshuri, nguko u Txizimu txi txi ni hanyisako; ni themba awe yotshe mbimo.

⁶MKOMA, khumbula wunene wako, ni wumbilu wako nguko i kale u txi hi mahela toneto.

⁷U nga alakanyele sionho sa wujaha wangu, hambi ni sihambunyeto sangu; aniko ni alakanye, MKOMA, ngu konaho ka wunene wako, ni wumbilu wako.

⁸MKOMA mbwa mnene kambe a lulamile; ngu kumaha keto wa gondisa vaonhi kutsimbila ngu tinzila ta tinene

⁹e tsimbitisa va kutiveka hahatshi ngu nzila ya yinene, ni ku va gondisa kumaha kuranda kwakwe.

¹⁰Totshe tinzila ta MKOMA ndo kateka ni ditshuri, ka vale va vekisako txitumelelano txakwe ni sirumo sakwe.

¹¹MKOMA, sionho sangu nza hombe ngutu, ni divalele kasi kudhumisa ditina dako.

¹²M'thu wule a thavako MKOMA ene wa m'gondisa nzila yi a fanelako kutsimbila ngu yona;

¹³Moya wakwe wu na zumbiseka kwati ni liveleko lakwe li na mana ditiko di di nga thembiswa.

¹⁴MKOMA a dhunda vale va mthavako ene wa va ninga kuziva Txitumelelano txakwe.

¹⁵Maso angu ma wonetela MKOMA yotshe mbimo, nguko ene wa ni hulukisa ka totshe tiphango.

¹⁶Ni rendekele u txi ni wona, MKOMA! Telwa ngu wumbilu ngu ngani, nguko ni nokha kambe ni kuxanisekani.

¹⁷Thavisa kupandiseka ka mbilu yangu; u txi ni hulukisa ka sixaniso sangu.

¹⁸Wona kupandiseka kwangu ni kuxupheka kwangu u txi ni divalela sotshe sionho sangu.

¹⁹Wona ti va nga talisa tona valala vangu! Ni livengo li va ni vengako ngu lona.

²⁰Ni lwele u txi ni hulukisa. Ani ni themba awe, u nga ni leke ni txi wiswa tingana.

²¹Wunene ni kululama si na ni vhikele, nguko themba yangu ni yi vekile kwako.

²²Awe Txizimu, hulukisa Israyeli ka sotshe sixaniso sakwe!