Read chopi Masalmo 3 Bible Online

Masalmo 3 - chopi bible

Masalmo 3

¹Dhavhidha, a bhate disalmo diya, mbimo yi a nga txi thava ka mwanana wakwe Absalome MKOMA, eto va nga talisa tona valala vangu! Va tate avale va ni wukelako.

²Mbavangi avale va wombako ngu ngani va txi kha vona: “Kha ku nga ho kuhanyiswa kwakwe ngu didhawa da Txizimu!”

³Aniko awe, MKOMA, u txitxhavangu txangu txo ni vhikela; awe u wudhumo wangu, ngawe u ni tsanisako.

⁴Ngu dipswi do guleka na peka huwa kwakwe MKOMA, se ene wa ni angula a di mmangoni kwakwe ko sawuleka.

⁵Na rwama ni txi otela wotshe wusiku, ngu msana ni txi wuka, nguko MKOMA wa ni vhikela.

⁶Kha ni na mbi va ni dizowa ni magumi a mazana a vathu, va nga ni randela kasi kulwa ni nani.

⁷Ngono, MKOMA, Txizimu txangu, u ta ni hulukisa, awe u pekako valala vangu mathamani awe u khunulako makwasa a va vakubiha.

⁸Kuhanyisa kuta ngu kwako, MKOMA makatekwa ako ma nave txitimwi ka ngamu yako.