Read chopi Masalmo 31 Bible Online

Masalmo 31 - chopi bible

Masalmo 31

¹Ka mthangeli wa vaembeleli. Disalmo da Dhavhidha. MKOMA, ani ni themba awe; u nga ni leke ni txi wiswa tingana. Ni hulukise, nguko awe u lulamile.

²Ni engise ta tinene u txi kuluveta ku ni hulukisa. Awe maha dirigwi dangu da wuvhikeli; awe maha mkhokhola wangu wa wuthavelo ni kuhanyisa!

³Awe u dirigwi dangu ni mkhokhola wangu! Ni tsimbitise u txi ni vhikela, ngu lirando la ditina dako da dinene.

⁴Ni thavise ka mlawu wu va nga ni riyela ngu wona, nguko awe u wuthavelo wangu!

⁵ Na ti veka ngu kuhetiseka manzani kwako; ni hanyise, MKOMA, nguko awe u wo thembeka!

⁶Na nyenya avale va khozelako sizimu sa makuhu, kambe themba yangu ni yi veka ka MKOMA.

⁷Ani ni na tsaka ni txi giya ngu lirando lako. Awe u woni kuxaniseka kwangu, u txi ziva ni kupandiseka kwangu;

⁸khwa ni leka ni txi wa manzani ka mlala, u ni mahile ni txi hanya ngu kutxhatxheka!

⁹Telwa ngu wumbilu ngu ngani, MKOMA, nguko na pandiseka; maso angu ma dokovela ngu kuxaniseka, kumweko ni moya wangu ni mmidi wangu.

¹⁰Ni hanya wutomi wangu ngu kuxaniseka, malembe a wutomi wangu ma pinda ni di kuxuphekani. Kupandiseka ka heta mitamo yangu; mmidi wangu wa goma.

¹¹Ni m'thu wa kurukwa ngu valala vangu ni va akelani, na nyenywa ngu vale ni zivanako navo. Avale va ni wonako hanzila va ni thava.

¹²Vathu va ni divate timbiluni kwawe, kufana ni m'thu wu a nga fa. Ni fana ni txiya txo tshotshwa.

¹³Ni engisile va txi womba-womba kubiha ngu ngani; ni taletwe ngu dizowa, nguko valala vangu va ni rambete txikungo, va lava ku ni daya.

¹⁴Aniko themba yangu yi kwako, MKOMA; se ani ni huwelela ti to awe u Txizimu txangu!

¹⁵Wotshe wutomi wangu wu manzani kwako; ni hulukise ka valala vangu va ni hingako!

¹⁶Wona ngu maso a wunene txithumi txiya txako; ni hulukise ngu lirando lako.

¹⁷MKOMA, u nga ni leke ni txi wiswa tingana, nguko ani ni dilela kwako. Vona vabihi va na wiswe tingana ve tshotshwa diphalani.

¹⁸Malata vathu va makuhu, nguko va womba kubiha ngu Txizimu txo sawuleka, txa kwa mbi na magwito, ngu kutiguleta ni kukanyisa.

¹⁹Mbwa hombe ngutu wunene wako, MKOMA! Awu u nga wu lulamisela avale va kuthembako; awu u mahelako vona vale va kuthembako, masoni ka votshe.

²⁰Ngu kuvhikelwa masoni kwako, wa va emela ka sikungo so biha sa vathu; kota txibhiya txo tsana, awe wa va vhikela ka siruko sa valala vawe.

²¹A na dhumiswe MKOMA, awu a nga ni mahela wumbilu wakwe wo xamalisa, ni txi nga a to ni veka mkhokholani.

²²Mu kukanakanani kwangu ni pimisile ti to u ni hambukisile masoni kwako; aniko, mbimo yi ni nga kudhana, u engisile huwa ya mikombelo yangu.

²³Randani MKOMA, anu motshenu mi ku sirandwa sakwe! MKOMA a vhikela avale va mthembako, aniko wa tsayisa ngutu avale va mu eyisako.

²⁴Tsanisani, mi tsanisa timbilu, anu motshenu, mi thembako MKOMA.