Read chopi Masalmo 34 Bible Online

Masalmo 34 - chopi bible

Masalmo 34

¹Masoni ka mfumeli Abhimeleki, Dhavhidha a ti hundile a txi nga wo bharuka, se ngu mhaka yeto, Abhimeleki a mtutumisile. Msana ka kuva a di khukhile, a to bhala Disalmo diya ene Dhavhidha. Ni na dhumisa MKOMA yotshe mbimo; ni na huwelela wudhumo wakwe ngu txisofu txangu, ni si gwiti.

²MKOMA ngene wudhumo wangu! Vathu va i ku sisiwana va na engisa, kambe va na tsaka ngu mhaka ya toneto.

³Huwelelani ni nani wuhombe wa MKOMA; a hi embeleleni hotshethu, hi txi m'dhumisa.

⁴Ni lavile MKOMA, se ene a ni xamute, a txi ni hulukisa kambe, aha ka dizowa dangu.

⁵Avale va mu wonako va na tala ngu litsako; kha va na mbi va ni kuwiswa tingana.

⁶Ngako txisiwana txi txi dhana MKOMA, ene wa txi xamula, kambe wa txi hulukisa ka sotshe sixaniso.

⁷Ngelozi ya MKOMA ya vhikela avale va mthavako yi va hulusa ka tiphango.

⁸ Duketani mipune mi txi ti wona to MKOMA mbwa mnene; a katekile m'thu wule a thembako ene!

⁹Thavani MKOMA, anu motshenu vasawuleki vakwe, nguko kha ku pwateki txilo ka wule a mthavako.

¹⁰Vanyatithombe va maha sisiwana, va pfa nzala, aniko ni txa tximwetxo kha txi pwateki ka vale va lavako Mkoma.

¹¹Vanangu, ngonani, mi ta ni engisa: Ni na mi gondisa kuthava MKOMA.

¹² Ngu wuhi m'thu wu asi randiko wutomi kani? Awule asi dhundiko kuhanya ngu mbimo yayingi kani?

¹³Ngu kota yeto, hambana ni kuruketela: Txisofu txako txi nga thuke txi womba makuhu.

¹⁴Hambuka ka wubihi, u txi maha ti i ku ta tinene; lava kudikha ngu kutimisela.

¹⁵Maso a MKOMA ma wonetela vo lulama ni tinzeve takwe ti engisela huwa yawe.

¹⁶Kuhenya ka MKOMA ku txitimwi ka vabihi, kasiku ve fuva ha ditikoni, ve divalwa.

¹⁷Vo lulama va dhana MKOMA se ene wa va pfa, a txi va hulukisa, ka sotshe sixaniso sawe.

¹⁸MKOMA a hafuhi ka vale va ku kupandisekani ka mbilu; ene wa hanyisa avale va si swiko va di ni kuthemba.

¹⁹Vathu vo lulama va dukwa ngu sixaniso so tala, aniko MKOMA wa va hulukisa ka sotshe.

²⁰ MKOMA wa vekisa otshe marambu awe: Ni da dimwedo kha di na mbi funywa.

²¹Vathu vo biha va fa ngu wubihi wawe; avale va nyenyako vo lulama va na tsayiswa.

²²MKOMA wa tirula wutomi wa vale va mthumelako; avale va mthembako kha va na mbi tsayiswa.