Read chopi Masalmo 36 Bible Online

Masalmo 36 - chopi bible

Masalmo 36

¹Disalmo da Dhavhidha, txithumi txa MKOMA. Ka mtlhangeli wa vaembeleli. Txionho txa womba-womba mbiluni ka m'thu wo biha. Kwakwe kha ku nga ho kuthava Txizimu.

²Ene apune a ti wona i di wamnene ngutu, kasiku asi woni txionho txakwe, e txi nyenya.

³Kuwombawomba kwakwe nga kubiha ni makuhu; a lekile ni kuengisa ni kumaha ti i ku ta tinene.

⁴Ngako a di otete, a pimisa kumaha kubiha; nzila yi a tsimbilako ngu yona hi nga ya yinene; kha ti lavi kuhambana ni kubiha.

⁵Aniko wumbilu wako, MKOMA, wu gulekile wu hoka ni nzumani; ditshuri dako da manela marefu.

⁶Kululama kwako nga hombe kufana ni mimango; mithetho yako yi etile kufana ni linene. Awe, MKOMA, wa xayisa vathu ni sihari.

⁷La xamalisa ngutu lirando lako, awe Txizimu! Hahatshi ka mabhapi ako, athu hi tipfa hi di kusisalani.

⁸Ha tsaka ngutu ngu kupfa kukhura ngu sakudya so tala sa nyumbani kwako; awe wa hi ninga kusela mati a mnamboni ka wunene wako,

⁹nguko awe u txisima txi txi ningako wutomi. Awe u Ditambo di di hi woningako.

¹⁰Engetela lirando lako ka vale va ku zivako ni kululama kwako ka vale va timbilu to lulama.

¹¹U nga leke avale va ti kulisako va txi ni kandetela, mwendo sigevenga si txi ni tutumisa.

¹²Ndiva vabihi va wite hahatshi, va wite, kha va na mbiswa ve wuka.